खोज

भैरहवा,  असार ।  भारतको सुनौली नाका कडाइ गर्दा राजस्व संकलनमा वृद्धि भएको छ । नेपाली उपभोक्ताहरुले एक सय रुपियाँ भन्दा बढीको सामान ल्याउंदा राजस्व तिर्नुपर्ने नियम बनाएको थियो । अहिले भैरहवा भन्सार कार्यालय बेलहियाले एक सय रुपैयाँ भन्दा बढिको सामान ल्याउँदा अनिवार्य रुपमा भन्सार लिदै आएको छ ।
सिद्धार्थ उद्योग बाणिज्य संघले नेपालको ब्यापार वृद्धि गर्न र राजस्व समेत संकलन हुने अपेक्षा सहित भन्सार निति कडाइका साथ पालना गर्न आग्रह गरेको थियो । नेपालले भन्सार नितीलाई कार्यान्वयन गर्दा भारतीय ब्यापारीहरुलाई भने टाउको दुखाइ बनेको छ । उनिहरु नेपालका उद्योगी ब्याबसायीले भन्सार निती कार्यान्वयन गराएको भन्दै विभिन्न तथ्यहिन आरोप समेत लगाएका छन् ।
सिद्धार्थ उद्योग वाणिज्य संघ, रुपन्देहीले चोरी तस्करीका सामग्री खरीद तथा विक्री नगर्न व्यवसायीलाई आग्रह गरेको छ । संघले चोरी तस्करीका घटनाहरु सुनिने गरेकाले यसतर्फ चनाखो हुन सुरक्षा निकाय तथा प्रशासनसँग आग्रह गरेको हो ।
संघले आयोजना गरेको भेटघाट तथा छलफल कार्यक्रममा बोल्दै अध्यक्ष ठाकुर कुमार श्रेष्ठले स्थानीय बजारमा पाइने सामानहरु स्थानीय बजारमै खरीद गर्ने बानी बसाल्न सर्वसाधारणलाई आग्रह गरे । उनले भने, ‘ भैरहवा भन्सारबाट १ सय रुपैयाँभन्दा बढीको सामान खरीद गरी ल्याउदा संक्षिप्त प्रज्ञापन भरेर कर भुक्तानी अनिवार्य गर्ने पुरानो नीतिनियम कार्यान्वयवन गरेकोमा यसको स्वागत गर्दछौं ।’ स्थानीय बजारमा खरीदारी गर्दा बिल बिजक अनिवार्य रुपमा लिनेदिने गर्न उनको आग्रह छ । अध्यक्ष श्रेष्ठले भने, ‘यसमा उपभोक्ता र विक्रेता दुवैलाई हामी आग्रह गर्न चाहन्छौं ।’ बेलहिया नाकामा कडाइ गरिएसँगै अन्य विभिन्न नाकामासमेत कडाइ सुरु गरिएको उनले बताए । यसले स्वदेशी उद्योग व्यवसायको प्रवद्र्धनमा समेत सहयोग पुगेको श्रेष्ठले बताए । अवैध व्यापारलाई संघले प्रोत्साहन नगर्ने र निरुत्साहित गर्ने बताउंदै अध्यक्ष श्रेष्ठले सीमामा कडाइ गरिदा केही भारतीय व्यवसायीले नेपाली व्यवसायीप्रति भ्रम फैलाएको भन्दै व्यवसायीमाथि लगाइएको आरोपमा कुनै सत्यता नरहेको स्पष्ट पारे । संघले नेपाल राष्ट्र बैंकबाट जारी मौद्रिक नीतिमा चालू पूँजी कर्जासम्बन्धी व्यवस्थाले बजार चलायमान नहुने अवस्था सिर्जना भएकाले तत्काल कार्यान्वयन नगरी हाललाई सो व्यवस्था गर्नुपर्ने र आगामी मौद्रिक नीतिमा नयाँ व्यवस्थाको माग गरेको छ । भैरहवा भन्सार कार्यालयका प्रमुख भन्सार अधिकृत मनिराम पौडेलले प्रवृत्तिलाई निरुत्साहित गरेको बताए । यात्रुले ल्याएको सामानबाट राजस्वमा ठुलो योगदान गर्दैन नेपालमै किन्ने बानी बसोस भनेर गरेको हो पुरानो नितीलाई मात्रै कार्यान्वयनमा ल्याइएको पौडेलले बताए ।
‘पारी जाने मान्छे धेरै कम भएका छन् ।’ पौडेलले थपे —‘अब हामी पछि हट्दैनौ ।’ नेपाल उद्योग बाणिज्य महासंघका लुम्बिनी प्रदेश अध्यक्ष कृष्ण प्रसाद शर्माले नाकामा भएको कडाइको विरोध भन्दा समर्थन धेरै भएको बताउंदै उद्योग बाणिज्य संघलाई भारतीय ब्यापारीहरुले नभएको आरोप लगाएको बताए ।उद्योग वाणिज्य महासंघका केन्द्रीय सदस्य तथा महासंघको उद्योग समितिका सभापति राजेश कुमार अग्रवालले सीमा नाकामा सुरु भएको कडाइले नतिजा दिन केही समय लाग्ने भएकाले धैर्य गर्नुपर्ने बताए । नेपाल उद्योग वाणिज्य महासंघका पूर्व केन्द्रीय सदस्य महेन्द्र कुमार श्रेष्ठले सीमा नाकामा कडाइ हुँदा राजस्व संकलनमा वृद्धि भएको र विभिन्न बिकृति कम भएको बताए । सिद्धार्थ उद्योग वाणिज्य संघका पूर्वअध्यक्ष कूल प्रसाद न्यौपानेले नियमअनुसार नै भन्सार कार्यालय अघि बढेको बताउंदै यस कार्यले समग्र देशलाई नै हित गर्ने बताए । संघका वरिष्ठ उपाध्यक्ष नेत्र प्रसाद आचार्यले तस्करी नियन्त्रण गर्न प्रहरी प्रशासनलाई आग्रह गर्दै आएको बताउंदै ठुला ब्यापारी तस्करमा संलग्न हुन नसक्ने तर्क गरे । लुम्बिनी प्रेस क्लब, रुपन्देहीकी अध्यक्ष सम्झना शर्माले स्वदेशी व्यवसायीले उपभोक्तालाई स्वदेशमै सामान किन्न उद्योग बाणिज्यसंघले आकर्षित गर्नुपर्ने बताइन । बजेटमार्फत कृषिलाई टेवा दिन प्याज र आलु आयातमा मूल्य अभिवृद्धिकर लगाउने घोषणाले स्वदेशी कृषकहरुलाई फाइदा पुग्ने भए पनि यसबाट अहिले नै मूल्यवृद्धि भइरहेको अवस्थामा एउटा निश्चित समय तोकी आत्मनिर्भर भएपछि मात्रै आलु र प्याजमा मूल्य अभिवृद्धिकर लगाउनुपर्ने संघको माग छ ।