खोज

बुटवल, असार ।  सिद्धार्थनगर नगरपालिकाले अपाङ्गता भएका व्याक्तिहरुको लागि परिचय पत्र वितरण अभियानको रुपमा सुरु गरेको छ । ग परिचय पत्र वितरणका लागि कार्यविधी नै बनाइएको छ । परिचय पत्र चार भाग ‘क’, ‘ख’, ‘ग’, ‘घ’ मा वर्गीकरण गरिएको छ । समितीको बैठक बसेर मापदण्ड अनुसार परिचय पत्र वितरण गर्ने गरिएको छ ।
‘हामीले कार्यविधी अनुसार एक वर्षमा एक सय जना अपाङ्गता भएका व्यक्तिहरुलाई खोजी÷पहिचान गरी परिचय पत्र उपलब्ध गराएका छौँ’ सिद्धार्थनगर नगरपालिकाका उपप्रमुख एवं समितीको संयोजक उमा अधिकारीले भनिन्, ‘वर्षौ भइसकेपनि धेरै जनाले परिचय पत्र पाउनु भएको थिएन, हामी निर्वाचित भएर आएपछि अपाङ्गता व्यक्तिहरु खोजी÷पहिचान गर्दै उहाँहरुको अधिकार उहाँहरुलाई दिइरहेका छौँ ।’
नगरपालिकाले अपाङ्गतालाई दश प्रकार शारीरिक अपाङ्गता, दृष्टि सम्बन्धी अपाङ्गता, सुनाई समबन्धी अपाङ्गता, श्रवण दृष्टिबिहिन अपाङ्गता, स्वर र बोलाई सम्बन्धी अपाङ्गता, मानसिक वा मनोसमाजिक अपाङ्गता, बौद्धिक अपाङ्गता, अनुवंशीय रक्तश्राव (हेमोफिलिया), अटिजम सम्बन्धी अपाङ्गता र बहुअपाङ्गतामा विभाजन गरेको छ ।
समितीले ४९ जनालाई शारीरिक अपाङ्गता, ५ जनालाई दृष्टि सम्बन्धी अपाङ्गता, ९ जनालाई सुनाई समबन्धी अपाङ्गता, २ जनालाई मानसिक वा मनोसमाजिक अपाङ्गता, १२ जनालाई बौद्धिक अपाङ्गता, ४ जनालाई अटिजम सम्बन्धी अपाङ्गता र १९ जनालाई बहुअपाङ्गता परिचय पत्र विवतरण गरिएको समितीको संयोजक उमा अधिकारीले बताइन् ।
‘क’ वर्गको ४ जना महिला र १० जना पुरुष गरी १४ जना, ‘ख’ वर्गको २२ जना महिला र ४० जना पुरुष गरी ६२ जना, ‘ग’ वर्गको ३ जना महिला र १५ जना पुरुष गरी १८ जना, ‘घ’ बर्गको १ जना महिला र ५ जना पुरुष गरी ६ जनालाई परिचय पत्र उपलब्ध गराइएको समितीले जनाएको छ । यी मध्ये ‘क’ वर्ग परिचय पत्र प्राप्त व्यक्तिले मासिक तीन हजार नौ सय ९० रुपैयाँ र ‘ख’ वर्गकाले दुई हजार एक सय २८ रुपैयाँ प्राप्त गर्ने गरेका छन् । विपन्न परिवारलाई यही सुविधाले समेत थोरै भएपनि राहत पुग्ने नगरपालिकाको विश्वास छ ।
‘वितरण गरिएको अपाङ्गता परिचय पत्र, परिचय पत्र मात्र होइन्’ संयोजक अधिकारीले भनिन्, ‘परिचय पत्रकै आधारमा उहाँहरुले राज्यबाट पाउनुपर्ने सबै सुविधा पाउन थाल्नु भएको छ ।’ अन्य व्यक्ति भन्दा अपाङ्गता भएका व्यक्तिहरुलाई राज्यले विभिन्न सेवा सुविधा दिदै आएको छ ।
‘छोरी जन्मजात कान सुन्न नसक्ने भएपनि राज्यबाट केही सेवा सुविधा पाइएको थिएन’ रुकसानाका वुवा अकरमले भने, नगरपालिकाले छोरीलाई अपाङ्गता परिचय पत्र दिएको छ, खुशी लागेको छ, भत्ता समेत पाउन थालिएको छ , यसले थोरै भएपनि हामीलाई राहत भएको छ ।यस्तै समितीका अनुसार नगरपालिकाको स्थानीय समन्वय समिती र अपाङ्ग बाल अस्पताल तथा पुनस्र्थापन केन्द्रको सहकार्यमा निकै न्यून रकममा नगरका २० जना अपाङ्गता भएका व्यक्तिहरुको काठमाण्डौँ स्थित अपाङ्ग बाल अस्पताल तथा पुनस्र्थापन केन्द्रमा उपचार समेत भइरहेको छ ।