खोज

बाँके, असार   ३० करोड रुपैया लागतमा निर्माण भएको बाँकेको कोहलपुरस्थित अत्याधुनिक सुविधा सम्पन्न बसपार्क चारपटक टेण्डर आह्वान गर्दा पनि कुनै व्यवसायीले संचालनका लागि रुचि देखाएका छैनन् । मासिक दुई लाखसम्मको भाडा महंगो भएको व्यवसायीको तर्क छ । आर्थिक मन्दीका कारण व्यापार व्यवसाय नचलेको अबस्थामा महंगो भाडामा बसपार्क संचालन गर्न नसकिने उनीहरुको भनाई छ । बसपार्क संचालनका लागि कोहलपुर नगर विकास समितिले पटक–पटक टेण्डर आह्वान गरेको भएपनि पनि कुनै पनि व्यवसायीले संचालन गर्न तयार छैनन् ।
‘चौथो पटक ग्लोवल टेण्डर आह्वान गर्दा पनि ठेक्का लाग्न नसकेको छैन ।’— कोहलपुर नगरपालिकाका प्रमुख प्रशासकिय अधिकृत टिकाराम ढकालले भने । टेण्डर सकिन केहि दिन बाँकी रहेको उनले बताए । कोहलपुर नगर समितिले झण्डै ३० करोड लागतमा लामो दुरीको बसपार्क निर्माण गरेको हो । नगर बिकास कोष मार्फत झण्डै २० करोड ऋण र १० करोड नगर बिकास समितिको लगानीमा निर्माण सम्पन्न भई गत चैत्र महिनामा पहिलो पटक टेण्डर आह्वान गरिएको थियो । समग्र व्यवस्थापन प्रबेश, टिकट काउन्टर, शौचालय र पार्किङ शुल्क भन्दै मुल्य अभिवृद्धि कर बाहेक प्रतिबर्ष न्युनतम मुल्य ९६ लाख ८६ हजार ४ सय राखेर टेण्डर आह्वान गरिएको थियो । तर कुनै पनि व्यवसायी टेण्डर प्रक्रियामा सहभागी भएनन ।
कोहलपुर–११ मा छोटो दुरीको बसपार्क बागेश्वरी यातायात प्रालिले टेण्डरमा सञ्चालन गरिरहेको छ । मासिक झण्डै २ लाख भाडा तिर्ने गरि सो बसपार्क सञ्चालनमा आएको हो । बागेश्वरी यातायात प्रालिका महासचिव टंक बस्यालले टेण्डर रकम बढि भएकाले व्यवसायीले हातहाल्ने अवस्था नरहेको बताए । उनले एक बसपार्क सञ्चालन भईरहेको अवस्थामा अर्को बसपार्क सञ्चालन हुने अवस्था समेत नरहेको बताए । ३ बर्ष अघि मात्रै करोडौको लागतमा निर्मित छोटो दुरीको बसपार्क सञ्चालनमा छ । कोहलपुरका एक स्थानिय बसपार्क टिकटक बनाउने हब बनेको बताउछन । उनले दैनिक युवायुवतीहरु समाजिक सञ्जालमा टिकटक बनाउनै भिड हुने गरेको बताए । बसपार्क सञ्चालनमा आउने भन्दै व्यवसाय गर्न सो स्थानमा सटर भाडामा समेत लिएका उनले बसपार्क सञ्चालनमा नआउदा आफुहरु मर्कामा परेको बताए ।