खोज

बुटवल, ३ असार ।

काठमाण्डौमा सम्पन्न प्रथम राइजिङ स्टार खुला टेनिस प्रतियोगितामा सिगलतर्फको स्पर्धामा अभिषेक बाँस्तोला र अभिलाषा विष्ट विजेता भएका छन् । राइजिङ स्टार टेनिस एकेडेमीद्वारा आयोजित प्रतियोगिताको पुरुष फाइनलमा शनिबार संघर्षपूर्ण जित हात पार्ने क्रममा अभिषेकले प्रदीप खड्कालाई १–६, ६–१ र ७–६ को सेटमा पराजित गरे ।

प्रणव खनाल र आर्यन गिरी तेश्रो भए । सातदोबाटोस्थित टेनिस कम्प्लेक्समा भएको महिलाको उपाधि भिडन्तमा अभिलाषाले सुनिरा थापालाई ६–३ र ६–२ को सोझो सेटमा हराइन् । प्रकृति श्रेष्ठ र आइशा डोल्कर गुरुङ तेश्रो बने । पुरुष÷महिला सिंगल्सका विजेताले १ लाख, उपविजेताले ५० हजार र तेश्रोले १२ हजार ५ सय नगद पुरस्कार प्राप्त गरे ।
नेपाल टेनिस संघको प्राविधिक सहयोगमा भएको प्रतियोगिताको भेट्रान ३५ वर्षमाथि पुरुष सिंगल्समा सन्तोष खत्री पहिलो भए । उनले फाइनलमा पूर्व राष्ट्रिय च्याम्पियन जितेन्द्र परियारलाई ७–५, ६–४ सोझो सेटमा पाखा लगाए । सन्तोषले ६० हजार तथा जितेन्द्रले ३० हजार नगद पुरस्कार पाए । तेश्रो भएका कमलबहादुर अधिकारी र दावा सोनाम शेर्पाले १०–१० हजार नगद पुरस्कार हात पारे ।

एक कार्यक्रमका बिच प्रतियोगिताका विजेता, उपविजेता खेलाडीहरुलाई पूर्व उपप्रधानमन्त्री कमल थापा, नेपाल टेनिस संघकी अध्यक्ष ज्योति राणा र महासचिव मनोहरदास मुल, आयोजक एकेडेमीका अध्यक्ष रविन प्रधान र प्रमुख कार्यकारी अधिकृत सिमान्त गुरुङले पुरस्कृत गरे । नेपाली टेनिसकै सर्वाधिक पुरस्कार राशीको प्रतियोगितामा खुला, भेट्रान र जुनियर गरी २४ स्पर्धामा प्रतिस्पर्धा भएको थियो । प्रत्येक स्पर्धाका पदक विजेतालाई पुरस्कार प्रदान गरिएको थियो । कुल पुरस्कार राशी १४ लाख ८५ हजार रुपैयाँ रहेको थियो । असार २७ गतेदेखि सुरु प्रतियोगितामा २ सय ६२ खेलाडीले प्रतिस्पर्धा गरेका थिए ।

बुटवलका निश्चललाई स्वर्ण

प्रथम राइजिङ स्टार खुला टेनिस प्रतियोगितामा बुटवलका निश्चल ज्ञवालीले यु—१० उमेर समुहमा विजेता बन्दै स्वर्ण पदक जितेका छन । उनले फाईनलमा पोखराका आरएस पौडेललाई ६—३, ६—४ को सोझो सेटमा पराजित गर्दै स्वर्ण चुमे । यसैगरि यु—९ उमेर समुहमा संघर्ष फौज्दार तृतिय भए । यु—१२ उमेर समुहमा सनवाज हुसैन तृतिय, यु—१४ उमेर समुहमा वृजेश अर्याल दोस्रो, मेन्स डबल्समा आशिष गुरुङ र राफा विष्णु तेस्रो भए । काठमाण्डौ बाहिर पोखरा र बुटवलमा लनटेनिस खेल बिकास भैरहेको रुपन्देही जिल्ला लनटेनिस संघका अध्यक्ष गोपाल ज्ञवालीले बताए । युवा खेलाडी उत्पादन गर्ने लक्ष्यसहित नियमित अभ्यास गराईदै आएको उनले बताए । ‘पछिल्लो ३ महिनादेखी पोखराबाट प्रशिक्षक भित्राउदा खेलाडीहरुमा खेल सीप वृद्धि भयो ।’— उनले भने । प्रतियोगितमा बुटवलबाट जुनियर र सिनियर गरि १५ जना खेलाडीहरुले विभिन्न समुहमा भाग लिएका थिए । देविनगरस्थित लन टेनिस कोर्टलाई स्तरवृद्धिको पहल भैरहेको भन्दै उनले थप २ वटा कोर्ट बिस्तार गरि अन्तराष्ट्रियस्तरको मापदण्डको बनाइने बताए ।