खोज

पाल्पा, ३१ जेठ ।

पाल्पाका विभिन्न ठाउँहरुबाट धमाधम अबैध युरिया मल बरामद भएको छ । किसानले खेतबारीमा मल प्रयोग गर्ने समय भएका बेला धमाधम भारतीय बजारबाट भन्सार छली गरी मल पाल्पा ल्याइएको अवस्थामा प्रहरीले बरामद गरेको छ ।

शनिबार मात्र भारतीय बजारबाट भन्सार छलेर ल्याउँदै गरेको ३ सय ७२ बोरा अवैध युरिया मल पाल्पा प्रहरीले बरामद ग¥यो । जिल्लाको रम्भा गाउँपालिका–१ हुँगीस्थित कालीगण्डकी करिडोर सडक खण्डबाट २ लाख ९७ हजार ६ सय मूल्य बराबरका ३ सय ७२ बोरा युरिया मल प्रहरीले नियन्त्रणमा लिएको थियो । नवलपरासीबाट रामपुरतर्फ मल लिएर जाँदै गरेको लु २ ख ३८१ नम्बरको ट्रकबाट उक्त मल प्रहरीले नियन्त्रणमा लिएको हो । शंका लागेर चेकजाँच गर्ने क्रममा हुँगी प्रहरी चौकीले बिल नभएको भारतीय जनउर्वरक परियोजना भारत युुरिया नामक १६ हजार ७४० केजी मल नियन्त्रणमा लियो । प्रहरीले नियन्त्रणमा लिएको अवैध मल स्थानीयको रोहबरमा बरामद गरी आवश्यक कारवाहीको लागि भैरहवा भन्सार कार्यालय पठाइएको छ ।

उक्त परिमाणको मल बरामद गरेको केही समयमै प्रहरीले मल भण्डारण गरी राखेको गोदाम नै फेला पा¥यो । रामपुर क्षेत्रमा धमाधम अवैध मल भित्रिएको सुईको पाएको प्रहरीले खोज्दै जाँदा जिल्लाको रामपुर नगरपालिका –५ बेझाडको एक सटरमा मल भण्डारण गरी राखेको फेला पारेको हो । रामपुरको बेझाडस्थित विजय श्रेष्ठको ४ तले पक्की घरको भुुई तलाको सटरमा अबैध मल भण्डारण गरी राखिएको थियो ।

अबैध मल भण्डारण गरी राखेको भनी गोप्य सुुचनाको आधारमा रामपुर नगरपालिकाकी उपप्रमुख बालकुुकारी थापाको संयोजकत्वमा गएको कृषि सहकारी अनुुगमनकर्ता, जनप्रतिनिधि, उद्योगी, व्यवसायीका प्रतिनिधि र प्रहरीसहितको टोलीले श्रेष्ठको सटर खोली हेर्दा भारतीय जनउर्वरक परियोजना भारत युुरिया नामक ६ सय ५० बोरो युरिया मल फेला पारेको थियो । मल फेला पारेपछि टोलीले उक्त सटर शिलबन्दी गरेको छ । इलाका प्रहरी कार्यालय रामपुरका प्रहरी निरीक्षक लक्ष्मण देवकोटाले आशंका लागेको स्थानमा अनुगमन गर्ने क्रममा भण्डारण गरी राखिएको फेला परेको बताए । उनले भन,े ‘सम्बन्धित व्यक्तिलाई नभेटेपछि ताला तोडेर हेर्दा ६ सय ५० बोरा मल फेला परेको हो, अवैधरूपमा भण्डारण भएको युरिया मल जनप्रतिनिधि, सरोकारवालाको रोहवरमा सटर कोठा शिल गरिएको छ । ‘अहिलेलाई शिल गरेर मल राखिएको छ, मल कसरी भित्रियो यसबारेमा प्रहरीले अनुसन्धान गर्नेछ, अवैधरूपमा ल्याइएको पाइएमा सम्बन्धित व्यक्ति वा व्यापारीलाई कानूनी कारवाही हुन्छ,’ डिएसपी वीरेन्द्र थापा भने । आन्तरिक राजस्व कार्यालयले भने अवैध रुपमा मल विक्री गर्नेलाई राजस्व चुहावट ऐन अनुुसार कारवाही गरिने बताएको छ ।

यहाँ अवैध मल भित्रिएको मात्र छैन, किसानलाई आएको सरकारी अनुदानको मल समेत निजी एग्रोभेटलाई विक्री गरेको पाइएको छ । केही दिनअघि सरकारले किसानलाई अनुदानमा उपलब्ध गराएको युरिया मल निजी एग्रोभेटलाई बिक्री गरेको पाइएपछि प्रहरीले नियन्त्रणमा लिएको थियो । जिल्लाको रामपुर नगरपालिका–७ स्थित हराभरा कृषि सहकारीले अनुदानमा आएको मल निजी एग्रोभेटलाई बिक्री गरेको थियो । उसले स्याङ्जाको वालिङ भकुण्डेस्थित गरिमा एग्रोलाई बिक्री गरी गाडीमा मल लैजाँदै गर्दा प्रहरीले नियन्त्रणमा लिएको हो । सहकारीले एग्रोलाई प्रतिबोरा एक हजार ५० का दरले बिक्री गरेको पाइएको छ । हाल किसानलाई बालीमा छर्न युरिया मल आवश्यक छ । तर अबैध रुपमा मल भित्रिए पनि किसानले सहजै पाउन सकेका छैनन् । बारीमा मकैका लागि मल राख्नुपर्ने बेला भए पनि अझै किसानको हातमा पुग्न सकेको छैन ।