खोज

बुटवल, ३१ जेठ ।

नेपालकै सबै भन्दा ठुलो सार्वजनिक यातायात सेवा प्रदायक संस्था पश्चिम नेपाल बस ब्यवसायी प्रालिले आफ्नो सेवालाई बिस्तार गर्ने क्रममा बुटवलको देवीनगर चौपारीमा टिकट काउन्टर स्थापना गरी सेवा प्रारम्भ गरेको छ । बुटवलदेखि संचालन हुने सबै रुटका लागि निर्धारित दररेटमै स्थानीयलाई टिकट सेवा उपलब्ध गराउने उद्देश्यले बुटवल ११ देवीनगरको चौपारी भन्ने स्थानमा टिकट काउन्टर शुभारम्भ गरिएको प्रालिले जनाएको छ ।

टिकट काउन्टर शुभारम्भ कार्यक्रममा सहभागी वक्ताहरुले नेपालकै ठुलो मध्येको वडा बुटवल ११ मा स्थानीय युवाहरुको बिशेष पहलकदमीका कारण स्थानीयकै सहयोगमा टिकट काउन्टर खोल्नु समय सान्दर्भिक रहेको बताएका छन् । नम्र ब्यवहार, मिठो बोली, यात्रुलाई गन्तब्यसम्म पुर्याउने हाम्रो जिम्मेवारी भन्दै सरोकारवाला निकायका प्रतिनिधिहरुले यात्रुलाई बसपार्कसम्म पुगेर कठिनता पुर्वक टिकट ब्यवस्थापन गर्ने परम्पराको अन्त्य गर्न स्थानीयस्तरमै काउन्टरको ब्यवस्था गर्नु अहिलेको आवश्यकता भएको बताएका छन् ।

सो टिकट काउन्टरको उदघाटन गर्दै बुटवल उपमहानगरपालिका वडा नम्बर ११ का वडाध्यक्ष रामचन्द्र क्षेत्रीले यात्रुहरुको सुविधालाई मध्यनजर गरेर घनावस्ती क्षेत्रमा सुविधायुक्त बस सेवाका लागि टिकट काउन्टर स्थापना गर्ने कार्यलाई बढावा दिनु पर्ने धारणा राखेका थिए । सो अवसरमा पश्चिम नेपाल बस ब्यबसायी प्रालिका प्रबन्धक रामचन्द्र भुसालले आफ्नो सेवालाई यात्रुहरुको माग अनुसार बढाउँदै लैजाने योजना रहेको उल्लेख गर्दै निकट भविष्यमा देवीनगरबाटै सुबिधायुक्त आधुनिक बसहरु संचालन हुने जानकारी गराए ।

स्थानीय युवाहरुको सक्रियतामा स्थापना गरिएको जि २५ क्लव बुटवल ११ को बिशेष पहल तथा आयोजना र पश्चिम नेपाल बस ब्यबसायी प्रालिको तत्वावधानमा संचालन गरिएको सो टिकट काउन्टर शुभारम्भ कार्यक्रममा चौतारी टोल विकास संस्था जुनु अर्याल भण्डारी, बस ब्यवसायी प्रेमप्रसाद पाण्डे, क्लवका कावा अध्यक्ष जगदिश न्यौपाने, महासचिव तेजेन्द्र खनाल, सुजन कुमार भारी लगायतले बस यात्रुलाई सुविधाजनक टिकटको ब्यवस्था गर्न काउन्टर आवश्यक रहेको चर्चा गरेका थिए ।