खोज

तिलोत्तमा, २५ जेठ ।

तिलोत्तमा नगरपालिका शिक्षा शाखाको एक विद्यालय एक सिर्जनशील कार्यक्रम अन्तर्गत गौतम बुद्ध माविको आयोजनामा वातावरण तथा सामाजिक जनचेतना सम्बन्धी सडक नाटक प्रतियोगिता बिहीबार सम्पन्न भएको छ ।

कार्यक्रममा तिलोत्तमा नगरपालिका शिक्षा शाखा प्रमुख गंगाराम आचार्यले बालबालिकाको पढाइलेखाइ मात्रै नभई बालबालिकाहरुलाई हरेक कुरामा सक्षम, सबल बनाउन स्कुल तहदेखि नै बिद्यार्थीहरुलाई सिर्जनशिल बनाउन यस्ता कार्यक्रमको आवश्यकता पर्ने र यो प्रतिष्पर्धामा भागलिने भाइबहिनीहरुलाई जित मात्रै नभै हारले भोलिको जितको ढोका खुल्ने बताए ।

प्रधानाध्यापक मृगेन्द्र रिजालले गौतम बुद्ध सामुदायिक विद्यालयका विद्यार्थी र अन्य विद्यालय बिद्यार्थीबिचको सम्बन्ध प्रगाढ हुने यहाँको भौतिक संरचना के कस्तो छ त्यस विषयमा पनि जानकारी लिने मौका पाउनुका साथै विद्यार्थीहरुको सर्वाङ्गीण बिकासको लागि पनि यस्ता खाले प्रतियोगिता आवश्यक रहेको बताए ।

विद्यालय ब्यवस्थापन समिति अध्यक्ष गणेश प्रसाद शर्मा न्यौपानेले अन्तर माध्यमिक विद्यालयबिच हुने सडक नाटक प्रतिष्पर्धाले अन्तर कला प्रष्फुटन हुने र समाजमा घटेका घटनालाई स्वतः प्रस्तुत गर्नेले समाजमा पनि राम्रो सन्देश जाने बताए । कार्यक्रममा सहायक प्रधानाध्यापक शालिग्राम खनालले पनि बोलेका थिए । सडक नाटक प्रतियोतिामा दुर्गादत्त मावि शंकरनगर प्रथम, जनज्योती मावि डिंगरनगर द्वितीय, शान्ती नमुना मावि तृतीय र गौतमबुद्ध सामुदायिक विद्यालय सन्त्वना भई पुरस्कृत भएका थिए । सडक नाटक प्रतियोगितामा १५ टिमको सहभागिता रहेको थियो ।