खोज

बुटवल, २६ जेठ ।

जुनियर खेलाडीहरुलाई प्रोत्साहन गर्ने उद्देश्यका साथ बुटवलमा जारी यु–१२ लिग क्रिकेट प्रतियोगिता २०८० मा शुक्रबार सम्पन्न लिग चरणको खेल सकिएसंगै अन्तिम चारको टुगो लागेको छ । प्रतियागितामा समुह ‘ए’ बाट ग्रिन प्लान्ट स्कुल र नेपथ्या तिलोत्तमा क्रिकेट एकेडेमी तथा समुह ‘बि’ बाट स्टार क्रिकेट एकेडेमी र बिएमडब्लु वेष्ट्रन क्रिकेट क्लब अन्तिम चारमा स्थान बनाएको छ । शनिबार पहिलो सेमीफाईनल खेलमा स्टार क्रिकेट एकेडेमी र नेपथ्या तिलोत्तमा क्रिकेट एकेडेमी तथा दोस्रो सेमीफाईनल खेलमा बिएमडब्लु बेष्ट्रन क्रिकेट क्लब र ग्रिन प्लान्ट स्कुल भिड्ने छन् ।

बुटवल उपमहानगरपालिका वडा नं ११, प्यारामाउण्ट बोर्डिङ स्कुलको सहयोग तथा बिएमडब्लु वेस्टर्न क्रिकेट एकेडेमीको आयोजनामा शुक्रबार भएको लिग चरणको पहिलो खेलमा ग्रिन प्लान्टले तिलोत्तमालाई ८ विकेट तथा दोस्रो खेलमा बिएमडब्लु वेष्ट्रन क्रिकेट क्लबले एभेरेष्ट बोर्डिङलाई ९ बिकेटले पराजित गरेको छ ।

देविनगरस्थित खेलमैदानमा भएको पहिलो खेलमा नेपथ्या तिलोत्तमाले टस जितेर ब्याटिङ रोज्दै २० ओभरमा ४ विकेटको नोक्सानीमा ९१ रनको लक्ष्य खडा गरेको थियो । तिलोत्तमाका लागि सुशान्त सुवेदीले ३ छक्का र ८ चौकाको मद्यतमा शानदार अर्धसतक पुरा गरे । उनले ६१ बलमा ५८ रन बनाए । ग्रिनका सन्जु रिमाल, कृश केसी र सरोज भट्टराईले १–१ बिकेट लिए । मध्यम लक्ष्यलाई ग्रिनका ब्याट्सम्यानहरुले १२.१ ओभरमा २ बिकेटको नोक्सानीमा भेटायो ।

उसका लागि रोहित कुवरल र कृश केसीले नटआउट २५÷२५ रनको योगदान दिए । तिलोत्तमाका सुशान्त सुवेदी र हिमान्सु पाण्डेले १–१ बिकेट लिए । ग्रिनका कृश केसी म्यान अफ द म्याचबाट पुरस्कृत भए । यसैगरी दोस्रो खेलमा टस जितेर एभरेष्टले १३.४ ओभरमा सबै बिकेट गुमाएर ६३ रनको लक्ष्य खडा गरेको थियो । यसका लागि अंकित बस्नेतले १० तथा आदित्य देवकोटाले २० रनको योगदान दिए । कम स्कोरमा रोक्न वेष्ट्रनका अमृत तिवारीले ३ तथा श्रीयान्सु र अनमोल पुनले समान २–२ बिकेट लिए । कम स्कोरलाई वेष्ट्रनका ब्याट्सम्यानहरुले ८.२ ओभरमा १ बिकेटको नोक्सानीमा भेटायो । ओपनर ब्यट्सम्यान युनिक ज्ञवाली ३० बलमा १९ तथा निश्चल पौडेल १४ बलमा ३१ रनको नटआउट पारी खेले । खेलमा वेष्ट्रनका निश्चल पौडेल म्यान अफ दी म्याचबाट पुरस्कृत भए ।

प्रतियोगितामा आयोजक वेस्टर्न क्रिकेट एकेडेमी, स्टार क्रिकेट एकेडेमी, तिलोत्तमा क्रिकेट एकेडेमी, एभरेस्ट ई. बो. स्कुल, ग्रीन प्लान्ट ई.बो. स्कुल, एमएसएमटी क्रिकेट एकेडेमी गरी रुपन्देहीका ६ वटा एकेडेमी र विद्यालयका टिमबिच प्रतिस्पर्धा भएको एकेडेमीका अध्यक्ष भुवन पाण्डेले बताए ।