खोज

बुटवल, २६ जेठ ।

गर्मी बढेसंगै बुटवलमा निःशुल्क चिसो पिउने पानी वितरण तथा सचेतना कार्यक्रम गरिएको छ । सामाजिक सेवामा अग्रसर रोटरी क्लब अफ बुटवल डाउनटाउनले शुक्रबार राजमार्ग चौराहामा गुँड, मिश्री र चिसो पिउने पानी वितरणसंगै गर्मीमा तातो हावा वा लुबाट जोगिने उपायबारे सचेतना कार्यक्रम गरेको हो ।

राजमार्ग चौराहामा सार्वजनिक यातायातका चालकहरुलाई मिठाई र चिसो पिउने पानी वितरण गरी उद्घाटन गरिएको थियो । कार्यक्रममा क्लबका अध्यक्ष भरत रानाले गर्मीको बेलामा काम बिशेषबाट हिंडेका नागरिकहरुलाई पिउने पानी वितरण गर्नु सामाजिक उत्तरदायित्व निभाएको बताए । सार्वजनिक स्थलमा पिउन पानीको ब्यवस्थापन नभएको बेला आफुहरुले सानो सहयोग गरेको बताए ।

चिकित्सकका अनुसार गर्मीको बेला एउटा ब्यक्तिले दैनिक साढे दुई देखी ३ लिटर पानी पिउनुपर्ने हुन्छ । यसैगरी गर्मीबाट बच्न सकेसम्म दिउँसोको बेला घाममा बाहिर ननिस्कने, निस्कनै परे पातलो कपडा टाउको छोप्ने तथा छाता ओढ्ने सुझाव दिन्छन् । गर्मीमा मदिरा सेवन, चिनीको मात्रा बढी भएको झोल पदार्थ कम पिउनुपर्ने चिकित्सकले सुझाव दिन्छन् ।

कार्यक्रममा संयोजक भानु केसीले गर्मीबाट राहत दिने गरी सडक यात्रुहरुलाई भेली, मिश्रीसंगै एक सय जार चिसो पानी बितरण गरिएको बताए । गर्मी बढेसंगै बुटवलमा अन्य चोकहरुमा समेत कार्यक्रम गर्ने तयारीमा रहेको उनले बताए । पिउने पानी वितरण तथा सचेतना कार्यक्रमलाई समाजसेवीहरु शम्भु भट्टराई, जमिन कक्षपति, अशोक प्रधान, नारायण तिवारी, पदम केसी, सन्जय चौधरी, हरि खरेल, जय शिवशक्ति वाटर ईण्डष्ट्रिजका सुनिल जयसवालबाट सहयोग भएको उनले बताए ।