खोज

सुनवल, २४ जेठ ।

नागरिक उन्मुक्ति पार्टीका संरक्षक रेशम चौधरीले नयाँ संविधान समावेशी हुन नसकेको बताएका छन् । बुधवार पश्चिम नवलपरासीको परासीमा आयोजित कार्यकर्ता भेटघाट तथा स्वागत कार्यक्रममा बोल्दै चौधरीले वर्तमान संविधानले भूमिपुत्र थारु र आदीवासी जनजातिको अधिकार सुनिश्चित गर्न नसकेको बताए । देशको नेतृत्वकर्ताको उपेक्षाले अझै पनि आफुहरु पछाडी परेको बताउदै चौधरीले अब संघर्षबाट अधिकार प्राप्त गर्नुपर्ने अवस्था आएको बताए ।

अधिकार प्राप्तिको लडाइँमा जेलभित्र पनि लड्दै आएको र अब खुला राजनीतिमा पनि लडिरहने बताए । सयौं राष्ट्रिय गीत लेख्ने, गाउने गरेको एक पत्रकार, कलाकारलाई राज्यले विभेद गरेर जेलमा बस्न बाध्य पारेको भन्दै जेलबाटै जन्मिएको नागरिक उन्मुक्ति पार्टीले यो देशको पहिचानवादी र पिछडिएका जनताको पक्षमा राजनीति गर्ने उनको भनाई थियो ।

राज्यले टीकापुर घटनालाई थारुले घटाएको भन्दै विभेदपूर्ण रुपमा आफुलाई फसाउने काम गरेको चौधरीले दाबी गरे । म कहिल्यै पनि जातीय विभेदको पक्षमा छैन,’ उनले भने, ‘अबको मेरो बोनसको यो जिन्दगी थारु, आदिवासी र पहिचानवादीको पक्षमा समर्पण गर्नेछु ।’

यस्तै २०८४ मा हुने निर्वाचमा मुलुकभर नागरिक उन्मुक्ति पार्टीका उम्मेदवारहरू विजयी भएर सिंहदरबार हाँक्ने पनि उनको जिकिर थियो । मन्तव्यको क्रममा नेता चौधरीले आफ्नो जेलभित्रका दुःखद अनुभव पनि सुनाए । साथै उनले अन्य दलका कार्यकर्ताहरूलाई लक्षित गर्दै अब पुराना पार्टी छोडेर आफ्नो नयाँ अभियानमा जोडिन आग्रह गरे ।

अघिल्लो निर्वाचनमा नेता चौधरी जेलमा रहँदा नै कैलालीबाट प्रतिनिधिसभामा निर्वाचित भएका थिए । गत मंसिरमा भएको निर्वाचनमा पनि उनी संरक्षक रहेको पार्टी नागरिक उन्मुक्ति पार्टीबाट तीन जना सांसद निर्वाचित छन् । यही वैशाख १५ गते गणतन्त्र दिवसको अवसरमा राष्ट्रपतिको सिफारिसमा चौधरीको जेल सजाय मिनाह गरिएको हो । त्यस विरुद्ध सर्वोच्चमा रिट दर्ता भई कारण देखाउ आदेश जारी भएको छ ।

कार्यक्रममा सो पार्टी बाट निर्वाचित लुम्बिनी प्रदेश सभा सदस्य बसन्ती नेपाली, केन्द्रीय सदस्य लक्ष्मण थारु र महेन्द्र प्रसाद चौधरी, जिल्ला अध्यक्ष ओमप्रकाश चौधरी लगायतले बोलेका थिए ।