खोज

चन्द्रौटा(कपिलवस्तु), २४ जेठ ।

सरस्वती आधारभूत विद्यालय शिवपुरमा नयाँ नेतृत्व सर्वसम्मत चयन भएको छ । विद्यालयमा मंगलबार सम्पन्न बृहत् अभिभावक भेलाबाट जगत बहादुर जि.सी. अध्यक्ष रहेको ९ सदस्यीय विद्यालय व्यवस्थापन समिति गठन भएको हो ।

अभिभावक भेलाबाट सर्बसम्मत चुनिएका दलित सदस्य बीना टोमाटा, महिला सदस्य आशा थारू तथा खुल्ला सदस्य किरण के.सी. र शोभा रिमाल, वडा प्रतिनिधि गंगा घर्ती मगर, शिक्षक प्रतिनिधि शान्ति कुमारी के.सी. र सदस्य सचिव सीताराम चौधरीसहितको ७ सदस्यीय पहिलो बैठकबाट कृष्णकला भारती र जगत बहादुर जि.सी. मनोनित भएका थिए ।

मनोनित सदस्यसहितको ९ सदस्यीय समितिको दोस्रो बैठकबाट जि.सी. सर्वसम्मत अध्यक्ष पदमा निर्वाचित भएका हुन् । शिवराज नगरपालिका वडा नं. १ का पूर्व वडाध्यक्ष समेत रहेका नवनिर्वाचित अध्यक्ष जि.सी.ले विद्यालयको अग्रगामी विकासका लागि आफू र नव निर्वाचित समितिले अहम भूमिका खेल्ने विश्वास ब्यक्त गरे ।

कार्यक्रमको उदघाटन सत्रमा शिवराज नगरपालिका उपप्रमुख शिवकुमारी थारूले आफूले ४ वर्षसम्म अध्यापन गरेको विद्यालयको चौतर्फी विकासमा धेरै परिवर्तन आएको औंल्याउँदै आगामी दिनमा समेत विद्यालय्को मुहार फेर्नमा सक्दो सहयोग गर्ने प्रतिबद्धता व्यक्त गरिन् ।

कार्यक्रममा शिवराज १ का वडाध्यक्ष खिमविक्रम के.सी.ले विद्यालयको शैक्षिक गुणस्तर अभिबृद्धिका लागि वडाबाट हुनसक्ने सहयोग गर्ने प्रतिबद्धता ब्यक्त गरे । यसैगरी भेलामा निवर्तमान विद्यालय व्यवस्थापन समिति अध्यक्ष छन्द बहादुर सिंह जि.सी., समाजसेवी बुद्धिजिवी बाबुराम खनाल, बुधराम थारू, शिवप्रसाद थारू, ऋषिराम खनाल लगायतले नव निर्वाचित समितिलाई बधाई तथा शुभकामना दिएका थिए ।

कार्यक्रमका बीच नगर शिक्षा शाखा प्रमुख दिनेश कुमार चौधरीले विद्यालय व्यवस्थापन समिति गठन प्रक्रियाबारे जानकारी गराएका थिए ।

यसैबीच अभिभावक भेलाले निशान पुनको अध्यक्षतामा शिक्षक अभिभावक संघ सर्वसम्मत चयन गरेको छ । भेलाले विद्यालय सेवा क्षेत्रका हरेक टोललाई समेट्ने गरी ११ सदस्यीय नयाँ शिक्षक अभिभावक संघ गठन गरेको हो । जसको सदस्यहरूमा कल्पना पुरी, बम बहादुर के.सी., पुष्पा थारू, सन्जु थारू, शान्ति पुन, केशब सुनार, कल्पना थारू, राजकुमारी थारू तथा शिक्षक प्रतिनिधिमा शारदा जि.सी. र सदस्य सचिवमा शान्ति कुमारी के.सी. चयन भएका हुन् ।

यस्तै बाल शिक्षा मावि शिवराज–२, जन आदर्श आधारभूत शिवराज–१०, बाल ज्योति मावि शिवराज–८ चुनावी प्रक्रियामा रहेको लगायतको अधिकांश विद्यालयमा धमाधम व्यवस्थापन समिति गर्ने क्रम जारी छ ।