खोज

चन्द्राैटा(कपिलवस्तु), २० जेठ ।

ईलाका प्रहरी कार्यालय गणेशपुरमा दुर्गा मन्दिरकाे उद्घाटन गरिएको छ । जिल्लाकाे विजयनगर गाउँपलिकामा प्रहरी उपरीक्षक प्रेम बहादुर बस्नेतले कार्यालय प्राङ्गणमा नव निर्मित दुर्गा मन्दिरकाे पूजापाठ गरि शनिबार मन्दिरकाे उद्घाटन गरेकाे जनाइएको छ ।

उद्घाटन कार्यक्रमलाई सम्बाेधन गर्दै उपरीक्षक बस्नेतले जिल्लामै शान्ति, सुरक्षा कायम राख्न प्रहरीले अहाेरात्र खटिरहेकाे बताए । यस प्रहरी कार्यालयले नागरिकलाई सुरक्षाको अनुभुति गराउन सफल भएको उनकाे भनाइ छ । शान्ति सुरक्षा र सामाजिक सद्भाव कायम राख्न यहाँका नागरिकले पूर्ण सहयोग रहेकाे उनले जनाए ।

प्रहरीलाई आफ्नो कर्तव्य पू्र्ण रुपमा पालना गर्न निर्देशन दिँदै नागरिककाे साथी बनेर नागरिकले अनुभुति गर्ने गरि काम गर्ने समेत उपरीक्षक बस्नेतले जिकिर गरे । यसैबीच विजयनगर गाउँपालिका अध्यक्ष गाेपाल बहादुर थापाले यस प्रहरी कार्यालयले यस क्षेत्रका जनतालाई सुरक्षा अनुभूति दिलाएकाे बताए । धर्म, संस्कृतिकाे संरक्षण गर्नु सबैकाे कर्तव्य भएको जनाउँदै यसले हाम्रो समाजमा धार्मिक सहिष्णुता, सामाजिक सद्भाव, भाइचाराकाे सम्बन्ध कायम गर्न अहम भूमिका निर्वाह गर्ने थापाले जनाए ।

दुर्गा मन्दिर निर्माण लागि सहयोग गर्ने व्यक्तित्वहरुलाई प्रशंसा पत्रले सम्मान समेत गरिएको छ । इलाका प्रहरी कार्यालय गणेशपुरका प्रहरी निरीक्षक कृष्ण राना मगरले विजयनगर गाउँपालिका, कृ्ष्णनगर नगरपालिकाका जनप्रतिनिधि, समाजेसेवी, अगुवा व्यक्तित्वहरुकाे सहयोगमा दुर्गा मन्दिर निर्माण गरिएको जानकारी दिए ।