खोज

तुल्सीपुर, १६ जेठ ।

लुम्बिनी प्रदेशका मुख्यमन्त्री डिल्लीबहादुर चौधरीले समान्य नागरिकले सहज रुपमा सेवा पाउने गरी दाङ तुलसीपुरस्थित राप्ती प्रादेशिक अस्पतालको बिकास गरिने बताएका छन् ।

१६औं गणतन्त्र दिवसको अवसरमा मंगलबार अस्पताल परिसरमा आयोजित कार्यक्रमलाई सम्बोधन गर्दै मुख्यमन्त्री चौधरीले भेगिय हिसावले राप्ती प्रादेशिक अस्पतालले साविक राप्तीको मात्रै नभई कर्णाली प्रदेशका जिल्लाहरुका नागरिकलाई पनि सेवा दिने गरेको हुँदा यसको विकास जरुरी रहेको बताए ।

अन्य हस्पिटलहरुले तुलसीपुरमा रिफर गरेका केशहरुलाई सुल्झाउन सक्ने गरी अस्पतालको सेवा सुविधा विकास गरिने उनले आश्वासन दिएका हुन् ।

बुटवल र दाङमा गरी दुई वटा प्रादेशिक अस्पताल लुम्बिनी प्रदेशमा रहेको र त्यसमा पनि बुटवलको अस्पतालको बिकासको लागि ६ अर्ब रुपैयाँको टेन्डर आह्वान भइसकेको हुँदा अब पालो राप्ती प्रादेशिक अस्पतालको आएको उनले बताएका थिए ।

राप्ती प्रादेशिक अस्पताललाई दुई सय बेड क्षमताको बनाउनका लागि कार्यक्रममै सहभागी स्वास्थ्य मन्त्री राजु खनाल र स्वास्थ्य सचिवलाई कागजात मिलाएर आउने मन्त्रिपरिषदको बैठकमा पेश गर्न मुख्यमन्त्री चौधरले निर्देशन दिएका थिए ।

अस्पतालहरुमा रहेको अनावश्यक जनशक्तिलाई कटौती गरी बिशिष्ट श्रेणीका डाक्टर ल्याउन पहल गर्ने उनले बताएका थिए ।

कार्यक्रमलाई सम्बोधन गर्दै प्रदेश अर्थमन्त्री धनबहादुर मास्कीले राप्ती प्रोदशिक अस्पतालको अवस्था बारे आफु परिचित रहेको भन्दै सामान्य भन्दा सामान्य नागरिकको पहुँच पुग्ने गरी अस्पतालको स्तरोन्नती र विकासमा लाग्ने आश्वासन दिएका थिए ।

‘यो अस्पताल रिफर सेन्टरको रुपमा रहेको भन्ने आलोचना छ,’ उनले भनेका थिए ‘अब अस्पताललाई दुई सय बेड क्षमतामा विकास गरी बाहिरका बिरामी यहाँ आउने वातावरण वनाउन पहल गर्ने छौं ।’

कार्यक्रमलाई सम्बोधन गर्दै दाङकै स्वास्थ्यमन्त्री राजु खनालले मुख्यमन्त्री चौधरीले तुलसीपुरस्थित राप्ती प्रादेशिक अस्पताललाई दुई सय बेड क्षमतामा विकास गर्नका लागि बारम्बार आग्रह गर्दै आएको हुँदा सोही अनुरुप आफुले मातहतलाई निर्देशन दिएको बताएका थिए ।

कार्यक्रमपछि मुख्यमन्त्री, चौधरी, अर्थमन्त्री मास्की र स्वास्थ्य मन्त्री खनालले अस्पतालमा उपचाररत बिरामीकहाँ पुगेर फलफूल वितरण गरेका थिए ।