खोज

दाङ, ५ जेठ ।

नेपाल कम्युनिष्ट पार्टी एकीकृत समाजवादीको दाङ जिल्ला अध्यक्षमा भुपबहादुर केसी चयन भएका छन् । समाजवादी पार्टीको शुक्रबार घोराहीमा सम्पन्न विशेष जिल्ला भेलाले केसीलाई अध्यक्षमा चयन गरेको हो । यसैगरी, उपाध्यक्षमा डिल्ली बहादुर पुन, गणेशकुमार चौधरी, विष्णु गुरुङ र सचिव जानका रेग्मीलाई चयन गरेको छ । उपसचिवमा डिलबहादुर बुढा, सूर्य बिसी र प्रेम बुढा चयन भएको समाजवादी पार्टीले जनाएको छ ।

पार्टीले १ सय ७१ सदस्यीय जिल्ला कार्यसमिति गठन गर्दै आगामी दिनमा जिल्लाका १० वटै पालिकामा वडा तहसम्मको संगठन सुदृढिकरण अभियान अघि बढाउने गरी नयाँ कार्य समिति चयन गरिएको बताईएको छ ।

पार्टी संसदीय दलका प्रमुख सचेतक मेटमणि चौधरी र लुम्बिनी प्रदेश कमिटी अध्यक्ष सोमप्रसाद पाण्डेको उपस्थितीमा आयोजित पत्रकार सम्मेलनमा विशेष जिल्ला भेलाले गरेको निर्णय सार्वजनिक गरिएको हो । सो अवसरमा प्रमुख सचेतक चौधरीले जिल्ला तथा केन्द्रीय तहको भुमिकामा रही काम गर्दै आएकाहरुबाट भएको गलत कामलाई पार्टीले अत्यन्तै गम्भीरतापूर्वक लिएको बताए । अवसरवादको बाटोमा लाग्नेहरु कहिले पनि राजनीतिमा सफल हुन नसक्ने भन्दै त्यस्ता व्यक्तिलाई सबैले चिन्नुपर्ने बताए ।

लुम्बिनी प्रदेश कमिटी अध्यक्ष पाण्डेले केही दिनअघिसम्म पार्टी मोर्चामा निकै जिम्मेवारीपूर्वक काम गरेकाहरुबाट भएको निर्णयले आफुलाई आश्चर्यमा पारेको बताए ।

नेकपा समाजवादी पार्टीबाट केन्द्रीय सचिव भागवत विश्वासी, केन्द्रीय सदस्य सारदा स्वर्णकार, हिराचन्द्र केसीले पार्टी परित्याग गरी पुरानै पार्टी नेकपा एमाले प्रवेश गर्न लागेका छन् । यसैगरी, जिल्ला अध्यक्ष सुरामणि बेल्बासे, उपाध्यक्ष शोभा शाह, सचिव डिल्ली डाँगीले पनि एमाले प्रवेश गर्न लागेका छन् ।

जसका आधारमा नेकपा एसले उनीहरुलाई कारवाही गरिएको प्रदेश कमिटीमा जानकारी गराएको छ । जिल्लामा नेकपा एसको उपस्थिती पछिल्लो समय कमजोर बन्दै गएको छ । केही समय अघि पनि जिल्लामा एसबाट जिम्मेवारीमा रहेकाहरु बाहिरिएका थिए ।