खोज

बुटवल, ५ जेठ ।

महाकाली –मेची साईकल यात्रामार्फत क्यान्सर बिरुद्ध अभियान थालेका तिलोत्तमाका एचबि वर्मा बिहिबार बुटवल आईपुगेका छन् । बैशाख २८ गते नेपाल–भारत सिमा गड्डाचौकी नाकाको महेन्द्रनगरबाट यात्रा शुरु गरेका उनी आठौ दिन बुटवल आईपुगेका हुन् । बर्मालाई रुपन्देही साईक्लिङ संघका उपाध्यक्ष अभिषेक भारी, सिद्धार्थ कटेज रेष्टुरेन्टका शाखा प्रमुख केशवराज बश्याल, मेन सेफ केशव अर्याल, एचआर म्यानेजर खगेन्द्र अधिकारी, फाईनान्स म्यानेजर पारिश्वर भण्डारी, हाउस किपिङ ईन्चार्ज कृष्ण तिवारी, बुटवल युनाईटेड साईक्लिङ क्लवका सचिव राजु तिवारी, सदस्य रविलाल सुवेदीले खादा, अबिर लगाएर स्वागत गरे । बर्मा कंन्चलपुरको बेलौरी, टिकापुरको कैलाली, नेपालगंज, अघैया, भालुवाङ, चन्द्रौटा, कृष्णनगर, हुँदै आठौ दिन बुटवलमा आईपुगेका हुन् ।

उनलाई सैनामैना नगरपालिकाबाट फरक क्षमता भएका कृष्ण क्षेत्रीले बुटवलसम्म साथ दिए । क्षेत्रीको जन्मजात शरिरको एउटा भाग चल्दैन तर पनि उनी निरन्तर साईकल चलाउँछन् । बर्माले यात्रा निक्कै उत्साहपूर्ण र उपलब्धिपूर्ण भएको बताए । आफुले सोचेभन्दा पनि धेरै सहयोग र साथीभाईहरु भेट्दै ठाउँठाउँमा स्वस्थ्यसंग साईकलको महत्व र क्यान्सर बारे सचेतना दिएको बताए । शुक्रबार बिहान उनी भैरहवा हुँदै नवलपरासी हिंड्ने बताए । ‘अब ८ दिनमा यात्रा पूरा हुन्छ’– उनले भने ।

सिद्धार्थ बिजनेश ग्रुप अफ हस्पिटालिटिका क्षेत्रिय प्रबन्धक महेन्द्र न्यौपानेले साईकल साहसिक खेलसंगै नेपाली पर्यटन उद्योगलाई टेवा दिनसक्ने रुपमा रहेको बताए । क्यान्सर सचेतना अभियानमा आफ्नो संस्थागत सहयोग गर्न पाउँदा निकै आभारी भएको समेत बताए । यात्रालाई सैनामैना साईकल साथीबाट जर्सी तथा सिद्धार्थ बिजनेश ग्रुप अफ हस्पिटालिटीबाट आफनो शाखाहरुमा आतिथ्यता सौजन्य गरेको छ ।