खोज

बुटवल, ३० वैशाख ।

तिलोत्तमा नगरपालिका वडा नं. ९ निवासी कमला वस्याल विगत ४ वर्ष देखि लगातार फेसनमा आएका नयाँ डिजाइनका कपडाहरू सिलाउँदै आएकी छन् । टेलरिङ्ग सेन्टर व्यवसाय सन्चालन गर्दै आईरहेकी कमलाले वडा नं ९ का स्थानीयलाई फेसनअनुसार सिलाएका कपडाहरूले सन्तुष्ट पारिरहेकी उनी राम्रो फेसन डिजाइनर बनी यस क्षेत्रमा अझै राम्रो काम गर्ने सोच बनाएको बताउँछिन् ।

आत्मनिर्भर बनी आफ्नो सीपमा अझै निखारता ल्याउन र व्यवसायलाई अघि बढाउन हाल सन्चालन भईरहेको महिलासँग उपप्रमुख कार्यक्रम अन्तर्गत ३ महिने एड्भान्स फेसन डिजाईनर तालिम लिईरहेको उनी बताउँछिन् । महिलासँग उपप्रमुख कार्यक्रम अन्तर्गत विभिन्न सिपमुलक तालिम लिएका तिलोत्तमा नगरपालिकाका अधिकांश महिलाहरु आत्मनिर्भर र स्वरोजगार बनिरहेका छन् । महिलाका हक, अधिकार, क्षमता, सशक्तिकरण, दक्षता , सामाजिक सुरक्षा, चेतना अभिवृद्धि गरी रोजगारी समेत दिन सफल भएका छन् भने कतिपय महिलाहरुले आफ्नै व्यवसाय सञ्चालन गरी आर्थिक आम्दानी समेत गरिरहेका छन् । महिलासँग उपप्रमुख कार्यक्रम अन्तर्गत गत आर्थिक वर्ष २०७८÷२०७९ मा १० जना एकल महिलालाई ढाकाको तालबाट हस्तकला सामग्री बनाउने तालिम, रू ५ लाख बजेटको २८ जनालाई रेशमको धागो तथा क्रिष्टलको चुरा माला बनाउने तालिम, ६५ जना महिलालाई थाकलको झोला बनाउने तालिम, ४४ जना महिलालाई जुत्ता चप्पल बनाउने तालिम दिईएको तिलोत्तमा नगरपालिकाका सामाजिक शाखा अधिकृत विनोद ज्ञवालीले जानकारी दिनुभयो । आर्थिक वर्ष २०७८÷०७९ मा नै रू ४६ हजार बजेटको ३३ जना महिलालाई २१ दिने जुत्ता चप्पल एड्भान्स तालिम, त्यसैगरी तिलोत्तमा नगरपालिका वडा नं. ५ का ३६ जना महिलाहरुलाई व्यूटिपार्लर सम्बन्धी तालिम, वडा नं. ९ का २० जना महिलाहरुलाई मन्टेश्वरी सम्बन्धी तालिम दिईएको र वडा नं. १० का ३० महिलाहरुलाई सिलाईकटाई सम्बन्धी तालिम दिएको तिलोत्तमा नगरपालिकाले जनाएको छ ।

गत आर्थिक वर्ष २०७८÷०७९ मा जम्मा २०० जना महिलाहरुलाई महिलासँग उपप्रमुख कार्यक्रम अन्तर्गत तालिम प्रदान गरेको जानकारी दिनुभयो । चालु आर्थिक वर्ष २०७९÷०८० मा १८ जना महिलालाई डल, कुसन तथा चुरा माला बनाउने तालिम दिइएको, वडा नं. ६ मा ५२ जना महिलालाई मन्टेश्वरी सम्बन्धी तालिम प्रदान गरिएको उनले बताए । २०७९ चैत २१ गतेदेखि तिलोत्तमा नगरपालिका वडा नं. ९ मा फेशन डिजाइनर सम्बन्धी ३ महिने सिपमुलक तालिम सञ्चालन गरिएको छ । सो तालिममा ३० जना व्यवसाय गरिरहेका महिला, १४ जना रोजगारी दिएका महिला र २ जना तालिम लिएपछि व्यवसाय सुरु गर्ने महिला गरी जम्मा ५६ जना महिलाको सहभागिता रहेको छ । हालसम्म जम्मा ३२६ जना महिलालाई तालिम दिएको तिलोत्तमा नगर उपप्रमुख जगेश्वरदेवी चौधरीले बताईन् ।

फेसन डिजाइनर सम्बन्धी सिपमुलक तालिम प्रदान गरी स्वरोजगार तथा व्यवसायी महिलाहरुको व्यवसाय उकास्न हौसला दिने र थप आत्मनिर्भर बनाई महिलाको आर्थिक आम्दानीमा समेत वृद्धि गरी रोजगारी सिर्जना गर्ने वातावरण बनाई सभ्य र समृद्ध समाज निर्माण गर्ने उद्देश्यले तालिम सञ्चालन गरिएको तिलोत्तमा नगरपालिकाका उपप्रमुख चौधरीले बताईन् । “रोजगार नभएका, आर्थिक अवस्था कमजोर भएका, बीचमै अध्ययन छोड्नुपरेका, एकल महिला, समुदायका पिछडिएका महिलाहरुको जीवन उकास्ने उद्देश्यले महिला तथा उपप्रमुख कार्यक्रम अन्तर्गत विभिन्न संघसंस्था मार्फत तालिम सञ्चालन गर्दै आएको र फलस्वरूप तिलोत्तमा नगरपालिकाका स्थानीय महिलाहरु पनि रोजगार तथा स्वरोजगार भएका छन्”–उनले भनिन् ।

हातमा भएको सीप सबैभन्दा महत्वपूर्ण भएकोले स्थानीय सरकार तिलोत्तमाका स्थानीय महिलाहरूको सीप, क्षमता बढाउँदै आत्मनिर्भरताको बाटोमा अग्रसर गराउन र उनीहरुको सबलीकरण गर्न महिला सँग उपप्रमुख कार्यक्रममा केन्द्रित रहेको उनले बताईन् । चैत २१‌ गतेदेखि सुरु गरिएको तालिमको उदघाटनका क्रममा आगामी दिनमा अझै महिलाको आर्थिक आम्दानी हुने यस्ता सिपमुलक तालिममा नगरका महिलाको सहभागितामा वृद्धि गर्नुपर्ने तिलोत्तमा वडा नं. ९ का वडा अध्यक्ष ध्रुव न्यौपानेले बताए ।

उनले तालिममा सहभागी महिलाहरुलाई तालिममा सिकेका सीपलाई आफ्नो व्यावहारिक जीवनमा समेत उपयोग गर्न र दैनिक जीवन सहज बनाउन सक्ने गरी फेसन डिजाइनर बनेर देखाउन समेत आग्रह गरे । सञ्चालन भईरहेको सिपमुलक तालिमको प्रशिक्षक नम्रता पचभैया मगर र आरती थापाले सहजिकरण गरिरहेका छन् । यो कार्यक्रम अन्तर्गत तालिम लिएर आत्मनिर्भर बन्न हाल आफ्नै व्यवसाय सञ्चालन गरिरहेको, स्वरोजगार बनेको तथा तालिममा सिकेको सीपबाट आफू दक्ष भएको र आफूले गर्ने काम गर्न सक्षम समेत भएको तिलोत्तमा ९ निवासी कल्पना भण्डारीले बताईन् । तिलोत्तमा नगरपालिका महिलाहरुलाई तालिमका माध्यमबाट सिप सिकाएर आत्मनिर्भर र स्वरोजगार बनाएर एउटा उदाहरणीय नमूना नगरपालिका बनेको छ । अन्य नगरपालिकाले पनि यस्तै सिपमूलक तालिम प्रदान गरी आ–आफ्नो नगरका महिलालाई आत्मनिर्भर र स्वरोजगार बनाएर आर्थिक आम्दानी पनि वृद्धि गर्न सकिन्छ ।