खोज

दाङ, २९ वैशाख ।

घोराही उपमहानगरपालिकालाई गल्ने फोहरको अभाव भएपछि पालिका भित्रका टोलबासीसँग छलफल सुरु गरेको छ । बायो ग्याँस उत्पादनमा गल्ने फोहर अभाव भएपछि दीगो रुपमा फोहोर व्यवस्थापन गर्न टोल विकास संस्थाका पदाधिकारीसँग सुझाव संकलन अभियान थालनी गरेको छ । सुन्दर सफा हरित वडा बनाउन टोल विकास संस्थाहरुका पदाधिकारीले फोहोर जथाभावी नफाल्ने योजना बनाउन सुझाव दिएका छन् ।

बाटो सफा सुग्घर बनाउन, सडक छेउँछाउँ फोहोर नहोस् भन्ने पालिकाको चाहनालाई पूरा गर्न साधन श्रोतले भ्याएसम्म आफ्नो घर वरपर, टोलको सफाईका बारेमा सबै जिम्मेवार बन्नुपर्नेमा टोल विकास संस्थाका पदाधिकारीले सुझाव दिएका छन् ।
घोराही १४ की सुशिला वलीले फोहर संकलनका लागि एउटा मात्रै गाडी टेलटोलमा आउने भएकाले नागरिकले गल्ने र नगल्ने फोहर एउटै गाडीमा राख्ने गर्दछन् । त्यसकारण गल्ने र नगल्ने फोहोर संकलनका लागि उपमहानगरले छुट्टाछुटै गाडी पठाइदिन अति नै आवश्यक रहेको वलीले बताइन् । बायो ग्याँस प्लान्टलाई दिगोरुपमा सञ्चालन र गल्ने फोहोरको उचित व्यवस्थापनका लागि अन्तत्र्रिmयालाई उपमहानगरले निरन्तरता दिएको छ ।

नगर उपप्रमुख हुमाकुमारी डिसीले गल्ने फोहोरलाई छुट्याएर राख्न सबैलाई आग्रह गरिन् । नगरले गल्ने फोहोरबाट वायो ग्याँस र मल उत्पादन थालेकाले यो अभियानलाई सफल पार्न पनि नगरबासीले गल्ने र नगल्ने फोहोरलाई छुट्टाछुट्टै राख्नुपर्ने र नगरलाई रुटिन बनाएर गाडीको व्यवस्था गर्ने बताइन् । गल्ने फोहरको कमी भएकाले सोचेजती ग्याँस उत्पादन हुन नसकेको उनले बताइन् ।

बाताबरण तथा विपद व्यवस्थापन समितिका संयोजक भानसिं बुढाले नगरबासीहरुले नगरपालिकालाई कर तिरेका छौँ भन्ने मानसिकताका हटाउन आग्रह गरे । फोहोर व्यवस्थापनका लागि निर्माण गरिएको वायो ग्याँस प्लान्टको प्रयोगमा ल्याउन, वातावरण स्वच्छ बनाउन र पालिकाको सुन्दरताका लागि फोहोर व्यवस्थापन प्राथमिकता रहनुपर्ने बताए ।

कुनै बेला घोराही बजारमा दैनिक ३० टन फोहोर संकलन हुने गरेकोमा अहिले घटेर १० टन मात्रै संकलन हुने गरेको भएपनि बजारका धेरै जसो ठाउँमा फोहोरले समस्या पैदा गरेको तर्फ ध्यानकर्षण गराउँदै वायो ग्यास प्लान्ट संचालनसँगै बजारको सुन्दरता कायम गर्दै सभ्य नागरिक बनाउने काममा नगरबासीलाई जुट्न अपिल गरे ।

सरसफाई व्यवस्थापन शाखा प्रमुख लक्ष्मण अधिकारीले सरसफाईका क्षेत्रमा भईरहेका प्रयास र अबको रणनीतिका बारेमा जानकारी गराएका थिए । आगामी वर्षको बजेटमा सफा, सुन्दर र हरित नगर बनाउन नगरबासीबाट आएका सल्लाह, सुझावलाई नीतिमा समावेश गरेर अघि बढ्ने प्रयास भएको उनको भनाइ थियो । समृद्ध टोल बनाउन स्थानीय सरकारले धेरै अधिकार दिएको हुँदा कार्यविधि अध्ययन गरेर जिम्मेवारीपूर्वक काम गर्न पालिकाले सहयोग गर्ने जानकारी गराएका थिए ।