खोज

बुटवल, २७ वैशाख ।

‘बचत सगै स्वास्थ्य’ नारा आत्मसाथ गर्दै तिलोत्तमाको दिपज्योती बचत तथा ऋण सहकारी संस्था लिमिटेडले आफ्नो शेयर सदस्यहरुको निःशुल्क स्वस्थ्य परीक्षण गरेको छ । केन सेन्टरको प्राविधिक सहयोगमा संस्थाका शेयर सदस्यहरुको लागि तीन दिने मधुमेह, उच्च रक्तचाप, मुटु, कलेजो र मृगौला सम्बन्धी निःशुल्क रक्त र पिसाबको परीक्षण गरिएको हो । कार्यक्रमको तिलोत्तमा नगरपालिका वडा नं. १ का अध्यक्ष फर्सुराम गिरीले उद्घाटन गर्दै नगरबासीलाई स्वास्थ्य पहुँचमा लैजाने गरी अभियान थालनी गर्नुपर्ने सुझाव दिए ।

कार्यक्रममा केनका अध्यक्ष दिनेश कक्षपतिले मधुमेह, मुटु, कलेजो र मिर्गौलाको समस्या समुदायमा फैलिरहेको भन्दै जीवनशैली सुधार गरेर रोगबाट बच्न सकिने कुरामा जोड दिए । आधुनिक जीवनशैलीको राम्रो व्यवस्थापन नहुँदा रोगहरु लाग्ने गरेको र त्यसबाट आर्थिक, मानसिक र शारीरिक दुःख हुने भन्दै समयमा नै ध्यान दिनुपर्ने बताए ।

शिविरमा चार सय जनाको परीक्षणको क्रममा १२ प्रतिशत मधुमेह, १७ प्रतिशत विरामीको मिर्गौलाबाट प्रोटिन निस्केको, २० प्रतिशत विरामीहरुको कलेजोको समस्या तथा ३० प्रतिशत विरामीहरुको रगतमा चिल्लो पदार्थ (ट्राईग्लेरेसाइड) उच्च देखिएको उनले बताए । शिविरमा सहभागी विरामीहरुलाई खानपान र जीवनशैलीबारे ३ दिने परामर्श समेत दिईने उनले बताए ।

दीपज्योति बचत तथा ऋण सहकारीका वरिष्ठ सल्लाहकार दधिराम गौतमले स्वस्थ्य शिविरको समापन गर्दै रोग निवारणको लागि पहिचान महत्वपूर्ण हुने बताए । सहकारी अभियान केवल आर्थिक समृद्धिमात्र नभई शेयर सदस्यहरुको स्वस्थ्य पनि भएको भन्दै आगामी दिनमा समेत कार्यक्रमको निरन्तरता दिन आग्रह गरे ।

कार्यक्रमका आयोजक तथा सहकारीका अध्यक्ष हुमनाथ पाण्डेले आफ्ना शेयर सदस्यहरुलाई स्वास्थ्य सचेतना जगाउने गरी कार्यक्रम गरेको बताए । समयमा नै रोगको पहिचान गरी समस्या समाधान गर्न सके थोरै खर्च र झण्झट हुने उनको तर्क छ ।

कार्यक्रम स्वास्थ समितिका संयोजक झुम प्रसाद थापा, दिपेन्द्र पौडेल, गोविन्द श्रेष्ठ, सहकारीका सल्लाहकार जगननाथ कंडेल, ब्यवस्थापक जीवन पाण्डेले रोग लागेर उपचार धाउनेभन्दा पनि जीवनशैली बदल्ने अभियान जरुरी रहेको बताए ।