खोज

दाङ, २६ वैशाख ।

घोराही उपमहानगरपालिका वडा नम्बर १० मा रहेको जनजागृति मावि लमडरुवाका छात्राहरुलाई सेनेटरी प्याड वितरण गरिएको छ । नेपाल महिला सामुदायिक सेवा केन्द्र दाङले विद्यालयमा एक कार्यक्रमको आयोजना गरी विद्यालयमा अध्ययनरत ३ सय छात्राहरुलाई सेनेटरी प्याड वितरण गरिएको हो । विद्यालयका प्रधानाध्यापक हुकुमबहादुर बुढाथोकीले नेपाल महिला सामुदायिक सेवा केन्द्रले गरेको सामाजिक कार्यहरुको बारेमा जानकार भएको भन्दै विद्यालयलाई सम्झिएकोमा धन्यवाद दिए । उनले सर्जिकल प्याडभन्दा स्थानीय उत्पादन प्याड धेरै गुणस्तरीय भएको भन्दै यसलाई सबै विद्यालयमा पु¥याउन अनुरोध गरे । छात्राहरुमा महिनावारी हुँदा विद्यालय छाड्ने समस्या अझै धेरै भएको भन्दै उनले यसका लागि अभियानले सहजता प्रदान गर्ने बताए ।

कार्यक्रममा बोल्दै नेपाल महिला सामुदायिक सेवा केन्द्रका उपाध्यक्ष विष्णु गिरीले संस्थाले महिलाहरुको सामाजिक एवं आर्थिक सशक्तिकरण र बालबालिकाहरुको शिक्षा एवं स्वास्थ्यको क्षेत्रमा काम गर्दै आएको बताउँदै छात्राहरुलाई महिनावारीको समयमा हुने समस्या समाधानका लागि अभियानकै रुपमा निःशुल्क सेनेटरी प्याड वितरण गरिरहेको बताइन् । उनले विद्यालयको अन्य विकासका लागि संस्थाले विद्यालयसँग सहकार्य गर्ने प्रतिवद्धता व्यक्त गरिन् ।

सेनेटरी प्याड पाएसँगै सोही विद्यालयमा अध्ययनरत छात्रा अञ्जली रसाईलीले आफूहरुलाई पुनः प्रयोग गर्न मिल्ने प्याड पाएकोमा खुसी व्यक्त गरिन् । अब महिनावारी भएको समयमा पनि विद्यालय आउन सहज हुने उनले बताइन् । उनले सर्जिकल प्याडभन्दा स्थानीय उद्योगमा उत्पादन भएको पुनः प्रयोग गर्न मिल्ने प्याड स्वास्थ्यका लागि र आर्थिक हिसाबले सजिलो भएको बताइन् । सोही विद्यालयमा अध्ययनरत अर्का छात्रा श्रृष्टी वलीले ग्रामीण क्षेत्रका विद्यार्थीहरुलाई निःशुल्क रुपमा प्याड सहयोग गरेकोमा संस्थालाई धन्यवाद दिइन् । “प्याड नभएका कारण विद्यालय छुटेको थियो अब छुटाउदिन”– उनले भनिन् । पुनः प्रयोग गर्न मिल्ने प्याड भएकाले प्रयोग गर्न पनि सहज हुने बताइन् ।

सो विद्यालयमा अध्ययनरत तीन सय बढी छात्राहरुलाई महिला स्वरोजगार तालिम केन्द्रले उत्पादन गरेको पुनः प्रयोग गर्न मिल्ने सेनेटरी प्याड वितरण गरिएको थियो । कार्यक्रममा नेपाल महिला सामुदायिक सेवा केन्द्रका कार्यक्रम प्रमुख आर.के.शीतलले संस्थागत जानकारी गराएका थिए । संस्थाका मनोविमर्शकर्ता लक्ष्मी ढकालले प्याड प्रयोगबारे जानकारी गराएकी थिइन् ।