खोज

बुटवल, २४ वैशाख ।

लुम्बिनी प्रदेशका निवर्तमान मुख्यमन्त्री लिला गिरीले सबै नागरिकको समान विकासविना लक्ष्य पुरा हुन नसक्ने बताएका छन् । उनले समाज रुपान्तरणका लागि पछि परेको समुदायलाई विशोष अधिकार दिएर भए पनि समान बनाउने काम गरेको भन्दै त्यसका लागि महिला आन्दोलन निरन्तर हुनु पर्नेमा जोड दिए । आईतबारबाट बुटवलमा शुरु भएको दिगो विकासका लागि महिला नेतृत्व न्याय, समानता, पर्यावरणीय अधिकारको सुनिश्चितता, सामाजिक रुपान्तरण सहितको दिगो विकासमा निश्चितता भन्ने नारा सहित महिलावादी मञ्च २०८० कार्यक्रममा बोल्दै गिरीले यस्तो बताएका हन् ।

कार्यक्रममा बोल्दै महिला मानव अधिकार रक्षक राष्ट्रिय सञ्जालका संस्थापक अध्यक्ष डा. रेणु अधिकारीले पदमा पुगेका महिलाहरुले सामाजिक रुपान्तरणको जिम्मेवारी बहन गर्नुपर्नेमा जोड दिईन् । राज्यले बनाउने नीति नियममा महिलाको पहुँच पुग्न नसक्नु दुःखद पाटो भएको भन्दै जब सम्म महिलाले आफैले बनाएका योजनामा चल्न पाउँदैनन् तब सम्म समाज रुपान्तरण हुन नसक्ने उनको भनाई छ । महिलाले अनौपचारिक क्षेत्रमा गरेको काम न्यूनतम ज्यालाभित्र नआउँदा सम्म आर्थिक रुपमा परिवर्तन संभव नभएको बताईन् । कार्यक्रममा राष्ट्रिय अपाङ्ग महासंघका केन्द्रीय सदस्य सावित्रा घिमिरे, महिला मानव अधिकार रक्षक सञ्जालका हेमा न्यौपाने, ओरेकका केन्द्रीय सल्लाहकार भूमिका श्रेष्ठ, किशोरी अधिकार मञ्च रुपन्देहीका कोषाध्यक्ष शालिनी मिश्रा लगायतले बोलेका थिए । दुईदिन सम्म चल्ने कार्यक्रममा शरीर मेरो नियन्त्रण कसको, संक्रमणकालीन न्याय चुनौतीहरु र रुपान्तरित नेतृत्वका सवाल विषयमा छलफल हुनेछ । कार्यक्रममा महिला मानव अधिकार रक्षक राष्ट्रिय सञ्जालका संस्थापक अध्यक्ष डा. रेणु अधिकारी, रेडियो लुम्बिनीका प्रमुख मिनाक्षी न्यौपानेले सहजीकरण गर्नेछन् । कार्यक्रममा लुम्बिनी प्रदेशका महिला उपमेयर, उपाध्यक्ष, अगुवा महिलाहरुको सहभागिता रहेको छ ।