खोज

बुटवल, २४ वैशाख ।

लुम्बिनी प्रदेश सरकारका विना विभागीय मन्त्री सन्तोष पाण्डेले जनताका मुद्दा उठाउन सञ्चारमाध्यमलाई आग्रह गरेका छन् । उनले समाज रुपान्तरणका लागि जनताका एजेण्डामा सरकारलाई झकझक्याउने र सरकारका नीति जनतालाइ बुझाउने गरी कलम चलाउन पत्रकारलाई आग्रह गरे ।

गोरखापत्र प्रकाशनको १२३ ओैं वर्ष प्रवेश तथा संस्थानको ६१ औं वार्षिकोत्सवको अवसरमा गोरखापत्रको लुम्बिनी प्रदेश कार्यालयले बुटवलमा आयोजना गरेको कार्यक्रममा बोल्दै मन्त्री पाण्डेले गोरखापत्रले जनताका मुद्दा बोक्नुपर्ने उल्लेख गरे ।

मन्त्री पाण्डेले भने–‘यसमा सरकारको छायाँ नपारौं, सत्य तथ्य समाचार निर्धक्क लेखौँ, नेपालको सिंगो इतिहास बोकेको गोरखापत्रको थप ब्राण्डिङ गर्न जरुरी छ ।’ उनले जनताको पक्षमा कलम चलाउने पत्रकारहरुको सुरक्षाका लागि सरकार प्रतिबद्ध रहेको उल्लेख गरे । ‘गोरखापत्र संस्थान नै संघीय सरकार मातहतको हो, यसमा काम गर्नेहरु सबैको सुरक्षा जरुरी छ, सरकारले थप ध्यान दिनुपर्छ’–उनको भनाइ छ ।

उनले लुम्बिनीको एक चिम्टी माटोको पनि बिदेशी पर्यटकले महंगो डलरमा किन्ने भन्दै अब लुम्बिनी आउने पर्यटकलाइ यहाँको माटो, बुद्धको तस्वीर, बुद्ध अंकित टोपी संगसंगै बेच्नुपर्ने धारणा राखे । यसो भएमा आर्थिक समृद्धि हुने मन्त्री पाण्डेको भनाई छ ।

नेपालीले भारतमा पुगेर एक बोतल जल बोकेर आउने गरेको स्मरण गर्दै संसारभरका बौद्ध मार्गीलाइ लुम्बिनीको एक चिम्टी माटो पनि प्रसाद हुने धारणा उनले राखे । त्यस अवसरमा बोल्दै पत्रकार महासंघ रूपन्देहीका अध्यक्ष रामराज पोखरेलले पत्रकारिता नेताका भजन गाउने साधन बन्न थालेको प्रति चिन्ता ब्यक्त गरे । उनले राज्यले पत्रकारको पेशागत सुरक्षाको ग्यारेन्टी गर्न आग्रह गरे ।

उनले अब राजनीतिक कुरामात्र गरे जनताले लखेट्ने अवस्था आउन सक्ने चेतावनी दिए । उनले नेपालमा पर्यटन क्षेत्रको बिकासका लागि राज्यले आधार तयार गरिदिनुपर्ने बताए । गण्डकी प्रदेशको पर्यटन विकास लोभलाग्दो भएको चर्चा गर्दै उनले लुम्बिनीमा अथाह सम्भावना भएर पनि यथेष्ट काम हुन नसकेको गुनासो गरे ।

पर्यटन ब्यवसायी माधव नेपालले राज्यले पत्रकारको सुरक्षा गर्नुपर्ने उल्लेख गरे । उनले मुलुकको आर्थिक समृद्धिका लागि सबै लाग्नुपर्ने बताए । देशमा आर्थिक समृद्धि ल्याउन गोरखापत्रले अहम भुमिका खेल्नुपर्ने उनको तर्क छ ।

नेपाल पत्रकार महासंघ रूपन्देहीका निवर्तमान अध्यक्ष यानेन्द्र जिसीले गोरखापत्रको ईतिहास जोगाउने दायित्व सरकारको रहेको भन्दै यसको संचालक भने जनता नै रहेको उल्लेख गरे ।

उनले भने–‘पत्रिकाले खबरदारी र निगरानी गरोस्, सेल्फ सेन्सरसीपमा छौँ, मिडियामा सरकारको छाया नपारौं, कसैको ईन्ट्रेष्टमा समाचार नबनोस्, समाचार ब्रेक गर्न सक्नुपर्छ, सरकारलाई खबरदारी गरोस् ।’

बुटवल उद्योग बाणिज्य संघका महासचिव विमलराज भट्टराईले १९५८ देखि सही दिशा निर्देशका लागि पत्रकारिता गरिरहेको भन्दै गोरखापत्रको प्रशंसा गरे । उनले कृषि, पर्यटन आर्थिक समृद्धिको आधार भएको भन्दै किसानका उत्पादन बेच्ने वातावरण सरकारले बनाउनुपर्ने बताए ।

नाट्टा लुम्बिनीका अध्यक्ष रचना पन्तले गोरखापत्रको बिश्वसनियता अरुको भन्दा बढी र आधिकारिकता रहेको उल्लेख गरे । उनले पर्यटन नै विकासको आधार रहेको बताए ।

रूपन्देही उद्योग संघका अध्यक्ष माधव पौडेल गोरखापत्रले जनमानसको विश्वास जित्नुपर्ने भन्दै अब आर्थिक क्षेत्रलाई जोड दिन आग्रह गरे । होटल ब्यवसायी संघ रुपन्देहीका पर्यटन उपाध्यक्ष रोमाकान्त पाण्डेले ओेझेलमा परेका र खोजमुलक समाचारको अपेक्षा गरेको बताए ।

कार्यक्रममा गोरखापत्रको बुटवल स्थित लुम्बिनी प्रदेश स्तरीय कार्यालयका प्रमुख हरि सुवेदी, समाचारदाता छवि पाण्डे, प्रदेश संयोजक भुवन कार्कीलगायतले पनि मन्तव्य व्यक्त गरेका थिए ।

समाचारदाता छवि पाण्डे सम्मानित

गोरखापत्रका बुटवल समाचारदाता छवि पाण्डे सम्मानित भएका छन् । गोरखापत्र प्रकाशनको १२३ औं बर्ष प्रवेश तथा संस्थानको ६१ औं बार्षिकोत्सव विशेष समारोह कार्यक्रम २०८० को बुटवलमा आयोजित कार्यक्रममा साढे २ दशकदेखि पत्रिकामा कार्यरत पाण्डेलाई कामको कदर स्वरुप दोसल्ला ओढाएर सम्मान गरिएको हो ।

पाण्डेलाई लुम्बिनी प्रदेश सरकारका मन्त्री सन्तोष पाण्डे, गोरखापत्रको बुटवल स्थित लुम्बिनी प्रदेश स्तरीय कार्यालयका प्रमुख हरि सुवेदी, प्रदेश संयोजक भुवन कार्की लगायतले सम्मान गरेका हुन् ।