खोज

बुटवल, २३ वैशाख ।

योगिकुटीस्थित देवस्थल मन्दिरको गुरुयोजना बनाएर धार्मिक पर्यटकीय स्थलका रुपमा विकास गरिने भएको छ । करिब ५ करोड रुपैयाँ लागतमा निर्माण गरिने वृहत गुरुयोजनामा बहुउद्देश्यीय धर्मशाला, सुन्दर र आकर्षक मन्दिर, हरियाली बगैँचा लगायत निर्माण गरिने अध्यक्ष अशोक गुरुङले बताए । बुटवल उपमहानगरपालिकाबाट ११ लाख रुपैयाँ, प्रदेश सरकारबाट ८ लाख रुपैयाँ सहयोगमा कुल ५८ लाख रुपैयाँ लागतमा मन्दिर पुनस्र्थापना गरिएको छ ।

वि.सं. २०१२ सालमा स्थापना भएको देवस्थल मन्दिर संचालक समितिको १३ औं साधारण सभाको शनिबार बुटवल उपमहानगरपालिकाका नगरप्रमुख खेलराज पाण्डेले उदघाटन गर्दै धार्मिक स्थलको संरक्षण गर्ने जिम्मेवारी आम नागरिक भएको बताए । योजनाबद्घ रुपमा तयार भएको गुरुयोजनालाई सबै क्षेत्रलाई समेटेर अघि बढ्न सके पूरा हुने उनले बताए ।

स्थानीय, प्रदेश र संघ सरकारबाट सहयोग मिल्ने गरी योजना अघि बढाउन जरुरी रहेको उनले बताए । बुटवल उपमहानगरपालिकालाई सौन्दर्यीकरण गर्ने अभियानलाई सफल बनाउन सबैको सहयोग जरुरी रहेको भन्दै यो काममा हात अघि बढाउन आग्रह गरे । छाडा चौपाया ब्यवस्थापन पहिलो शुरुवात गर्न लागेको भन्दै यो काममा बासिन्दाले अपनत्व लिएर गौशालामा सहयोग गर्न सुझाव दिए । छाडा चौपाया ब्यवस्थापन गर्न सके सडक दुर्घटना न्युनीकरण हुने उनले दाबी गरे ।

कार्यक्रममा बुटवल देविनगर निवासी शताब्दी पुरुष पिताम्बर न्यौपाने, निवर्तमान अध्यक्ष रामचन्द्र ज्ञवाली, मन्दिरका पुजारी केशव ज्ञवाली, पण्डित रामचन्द्र ज्ञवालीलाई सम्मानपत्र र दोसल्लाबाट सम्मान गरिएको छ ।

योगिकुटीस्थित बगैचाको नामबाट पहिचान बनाएको स्थललाई धार्मिक, पर्यटकीय स्थल निर्माण भएको देखिन्छ । मनोरम बगैचामा दक्षिण भारतका ऋषिमुनी, साधुसन्त योगीहरु ज्ञानको खोजी र शालिग्रामको उद्गम थलो कालिगण्डकी पितृश्रद्घा कागबेनी गलेश्वर हँुदै मुक्तिनाथबाट हिमालय पर्वतसम्मको यात्रा गरेर फर्किदा बास बस्ने र विश्राम गर्ने पवित्र थलोको रुपमा उपयोग हुँदै आएको जनश्रुति छ । दुर्गा भवानीको पुजापाठका लागि मन्दिर स्थापना भएको हो । मन्दिर ८ कठ्ठा २ धुर जग्गामा पुर्वाधार निर्माण भएको छ । स्वर्गीय शेर बहादुर गुरुङले सिद्धेश्वर महादेवको मन्दिर, निवर्तमान अध्यक्ष पुर्णानन्द गिरिले मन्दिरको मुलगेट निर्माण, समाजसेवी पप्पु बिक सेन्चुरीले बाबाआमाको स्मृतिमा नन्दी मन्दिर भगवानको निर्माण र समाजसेवी स्वर्गीय दिल बहादुर पौडेल क्षेत्रिले स्वस्थानी मन्दिर निर्माण गरेका हुन् । यही स्थानबाट स्वर्गीय सुवेदार मेजर जित बहादुर गुरुङ र शेर बहादुर गुरुङको अगुवाई गरी पाठशाला स्थापना भएको थियो ।

कार्यक्रममा मणिमुकुन्द कलेजका प्राचार्य टुक बहादुर क्षेत्री, मन्दिर ब्यवस्थापन समितिका सल्लाहकार सुरज भट्टराई, महेन्द्र थापा, जनजागरण महिला समूहका अध्यक्ष मन्जु खड्का, सचिव कमल नेपाल, कोषाध्यक्ष हरि घिमिरेले मानवलाई नैतिकता सिकाउने काम धार्मिक क्षेत्रको योगदान रहेको बताए ।