खोज

चन्द्रौटा (कपिलवस्तु), २२ बैशाख ।
कपिलवस्तुको शिवराज नगरपालिका वडा नम्बर–५, चन्द्रौटामा अवैधरूपमा प्रसूति सेवा सञ्चालन गरेको पाइएको छ । शिवराज नगरपालिकाको विरपुर स्वास्थ्य चौकीमा कार्यरत अनमी पुनम पोख्रेलले आफ्नै घरमा नागरिकको स्वास्थ्यमाथि खेलवाड गर्दै मापदण्ड विपरित प्रसूति सञ्चालन गरेको स्थानीयले गुनासो गरेका छन् ।
विगत वर्षदेखि विना दर्ता अवैध रूपमा प्रसुति सेवा उनले सञ्चालन गरेकी छन् । हरि पोखरेलकी श्रीमती हुन पुनम पोखरेल । उनले श्रीमानकै आडमा यो कार्य गरेको अरोप लागेको छ ।
पहुँचको भरमा सञ्चालन गरेको प्रसूति सेवाको कसैले विरोध गर्न सकेका छैन्न श्रीमानको संरक्षणमा विगत वर्षाैदेखि विना दर्ता अवैध रूपमा प्रसूति सेवा सञ्चालन गरिरहेका नाम नखुलाउने शर्तमा एक स्थानीयले भने । निःस्वार्थ सेवा गर्ने स्वास्थ्य कर्मचारी हुनुपर्ने पुनम पोख्रेलले गर्भवती महिलाहरूलाई आफ्नो घरमा प्रसुति गराउन दबाब दिने र मोटो रकम असुल्दै आएकी छन् ।
आफ्नो घरमा प्रसुति गराउन आउने महिलालाई आक्सीटोसिन इन्जेक्सन दिने गरेकोले महिलाहरूलाई स्वास्थ्यमा समस्या देखिएको छ । उक्त औषधि डब्लु एचओ को मापदण्ड अनुसार प्रयोग नगरि जथाभावी प्रयोग गर्नले महिला स्वास्थ्यमा गम्भीर खेलवाड गरेको जनाइएको छ ।
स्वास्थ्य चौकी विरपुरमा २४ सै घण्टा प्रसुती सेवा सञ्चालन भएपनि आफ्नो घरबाट विना दर्ता सेवा सञ्चालन गर्दा प्रश्न समेत उठाउने गरेका छ । यसबारे शिवराज नगरपालिकाका स्वास्थ्य शाखा प्रमुख चुडामणी भट्टराईले पटक–पटक यस्तो गुनासो आएपछि सेवा सञ्चालन नगर्न वा दर्ता प्रक्रिया पुरा गर्न बारम्बर सुझाएको बताए ।
पछिल्लो समय गुनासो बढेपनि यसबारे कार्यालय गएपछि अनुगमन गरेर मात्र प्रक्रिया अगाडि बढाउने उनले जनाए । आमा तथा नवजात शिशु सुरक्षा कार्यक्रम निर्देशिका २०७८ ले घरमा हुने प्रसुती कार्य शून्यमा ल्याउने निति अवलम्बन गरेको छ ।
यता अनमी पोख्रेलले तालिम लिएपनि घर प्रसूति सेवा नदिएको जिकिर गरिन ।
अरूले आरोप लगाएपनि आफूले कसैसँग पैसा नलिएको जनाउँदै स्थानीय भएको हिसाबले अप्ठ्यारो परेका मुस्लिम समुदायका केही महिलालाई सेवा दिएको उनको भनाइ छ । यता अरोप लागेका हरि पोख्रेलले नगरपालिकामा कार्यरत रहेका कर्मचारीको सरुवा लगायतको विषयमा आफूले कुरा उठान गर्दा प्रतिशोधको भावना मिडियाबाजी भएको बताए ।
स्थानीय भएको हिसाबले कतिपय जटिल परिस्थितिमा आफ्नो श्रीमतीले कतिपय महिलालाई सहयोग गरेको हिसावले खुसी भएर दिएको रकम लिएको उनले स्वीकार गरे । तर घरमा प्रसुती सेवा अवैधरूपमा सञ्चालन नगरेको दाबी गरेका छन् ।