खोज

बुटवल, बैशाख- विद्यालयमा हुने गरेका साना कामबाट विद्यालय सुध्रिने गरेको उदाहरण गौतमबुद्ध आधारभूत विद्यालयले देखाएको छ । कञ्चन गाउँपालिकाको वडा नंं. २ मटेरियामा रहेको उक्त विद्यालयमा खानेपानीको धारा निर्माण, शौचालय मर्मत र विद्यालयमा जम्मा भएको फोहर फाल्ने खाल्डो खनिएपछि विद्यालयको वातावरण चिटिक्क  देखिएको हो ।
विद्यालयका प्रधानाध्यापक केदारप्रसाद पौड्यालले विद्यालयमा ८ वटा धारा जडान, एक वटा शौचालय मर्मच र फोहर फाल्ने खाल्डो खन्ने काम गरिएको र त्यसले विद्यालयको वातावरण देख्न लायक भएको बताए । पैसा धेरै लगानी भएको त होइन प्रधानाध्यापक पौड्यालले थोरै आर्थिक लगानीले पनि काम गर्न सकिने रहेछ । विद्यालयमा खानेपानीको ८ वटा धारा जडान गर्दासमेत बालबालिकाले पानीका लागि धेरै समय कुर्न नपर्ने अवस्था आउनुको साथै देख्दा समेत आकर्षक देखिएको बताए । उनका अनुसार यि काम गर्नका लागि कालिका स्वावलम्वन विकास केन्द्रले एक लाख ९ हजार सहयोग गरेको थियो ।
विद्यालयमा कोरोना महामारीका कारण बालवालिकाको सिकाइमा परेको क्षति कम गर्ने उद्देश्यले संचालित कार्यक्रम अन्तर्गत उक्त सहयोग गरिएको हो ।
प्रधानाध्यापक पौड्यालले उक्त कार्यक्रम अन्तर्गत टोल कक्षा संचालन गरेको र उक्त कार्यक्रमले बालबालिकाको सिकाइ सुधार्नमा सहयोगी बनेको बताए । बालवालिकाको शिक्षाको स्तरलाई माथि उठाउन महिनामा २० दिन दिनको १ घण्टाको समय छुट्याएर उनीहरुलाई टोल कक्षाको नाम दिइएर पृष्ठ पोषण कक्षामा सहभागी गराउने गरिएको थियो । उक्त कक्षामा खेल तथा मनोरञ्जनका माध्यमलाई प्राथमिकता दिने गरिएको टोल कक्षा संचालन गरेकी शिक्षक पुष्पा कार्कीले बताइन् । उनका अनुसार विद्यालयमा कक्षा १, २ र ३ मा रहेका ६४ जना बालबालिकालाई दुई समूहमा विभाजन गरी टोल कक्षा संचालन गरिएको थियो । विद्यालय समय सकिएपछि उनीहरुलाई कथा सुनाउँदै, खेल खेलाउँदै, एक आपसमा सहयोग गराउँदै टोल कक्षा चल्ने गरेको छ । कार्यक्रमको अबधीमा दुइ पटक तालिमको अवसर मिलेको र त्यसले आफुमा सिकाउने शैलीमा परिवर्तन आएको शिक्षक कार्की बताउँछिन् । उनले सिकाउने तरिकाहरु सिक्न पाउँदा आफुमा परिवर्तन आएको र बालबालिकालाई सिकाउनुपर्छ भन्ने महशुस समेत आफुमा गराएको बताइन ।

हामीले अभिभावकसँग बस्ने र छलफल गर्ने गर्यो शिक्षक कार्कीले भनिन्, यसले बालबालिकाको सिकाइको अवस्था जानकारी दिन, घरमा पढाइको अवस्था बुुझ्न र बालबालिकाको सहयोगी बन्नका लागि मद्दत पुग्यो । प्रधानाध्याापक पौड्यालले कार्यक्रमबाट विद्यालयको वातावरणीय सुधारका साथै बालबालिकाको सिकाई सुधार र शिक्षकमा सिकाउने शैलीको विकास भएको बताए । नजान्नेहरु जान्ने हुने अवसर पाए, सानो मर्मतबाट शौचालय प्रयोगमा आयो प्रधानाध्यापक पौड्यालले भने, शिक्षकमा समेत परिवर्तन देखा पर्यो ।
कालिका र यूनिसेफबाट संचालित कार्यक्रमले शिक्षकका लागि ट्याब, ब्लु तुथ स्पीकर, शिक्षकलाई शिक्षक गाईड तथा डिकोडेबल बुक प्रदान गर्नुका साथै बिद्यालयमा शैक्षिक सामाग्रीहरु तयार गर्नका लागी सहायक स्टेसनरी सामाग्री प्रदान गरेको छ । त्यसैगरी बालवालिकाहरुलाई अभिभावकको सहयोगमा घरमानै गर्न सकिने ४५ दिने क्रियाकलाप पुस्तक, लेख्न सिकौ, कापी, १ प्याकेट पेन्सिल, १ प्याकेट कलर पेन्सिल, १ प्याकेट क्यारोन कलर, लुडो, बल, ग्लुस्टिक, स्किपिङ्ग डोरी सहितको झोला जस्ता सिकाइ सामग्री प्रदान गरेको थियो । गौतमबुद्ध आधारभूत विद्यालयमा बालबिकास केन्द्रदेखि कक्षा ८ सम्म २८० बालबालिका अध्ययन गर्छन् ।