खोज

दाङ, १७ वैशाख ।

दाङको इतिहास बोकेको पर्यटकीय स्थल तुलसीपुर –१९ छिल्लीकोटलाई शान्ति सुरक्षासंग जोड्नको लागि अस्थायी प्रहरी पोष्ट स्थापना गरिएको छ । सो स्थानमा माग गरेको करिब २८ वर्षपछि अस्थायी प्रहरी पोष्ट स्थापना भएको हो ।

अस्थायी प्रहरी पोष्ट उदघाटन कार्यक्रममा तुलसीपुर उपमहानगरपालिकाका प्रमुख टिकाराम खड्काले लामो इतिहास बोकेको छिल्लीकोट हरेक हिसाबले उत्कृष्ट ठाउँ भएको बताए । राजदरबारदेखि युद्ध भएको ठाउँले समेत चिनिने पर्यटकीय स्थलको संरक्षण गर्न प्रहरी पोष्टले सहयोग पु¥याउने उनको भनाई छ । यहाँसम्म घुम्न आउने पर्यटकले अपराधजन्य क्रियाकलाप गरेमा स्थानीयले अब असुरक्षा महशुस गर्न नपर्ने बताए । छिल्लीकोट दाङ र रोल्पाको सिमानासंग जोडिएको छ । यहाँँ आन्तरिक र बाह्य पर्यटकको दैनिक जसो उपस्थिति रहने गरेको छ ।

लुम्बिनी प्रदेश प्रहरी प्रमुख प्रहरी नायब महानिरीक्षक उमेशराज जोशीले प्रहरीसंग संगसंगै मिलेर काम गर्न स्थानीयलाई सुझाव दिएका छन् । प्रहरी मेरो साथी भन्ने नारालाई सार्थक बनाउन उनले आग्रह गरेका छन् । कुनै कुनै मानिस खराब विचारका हुने भएकाले गलत गतिविधि हुने गरेकोले त्यसको जानकारी गराउन स्थानीयलाई आग्रह गरे । प्रहरीलाई स्थानीय, र स्थानीयलाई प्रहरीले सहयोग गर्दै काम गर्न उनले अनुरोध गरेका छन् । प्रहरीले एक्लै कुनैपनि काम गर्न नसक्ने भएकाले सबैको साथ सहयोगले मात्रै प्रहरी सफल हुने उनले बताए । प्रहरी आम नागरिको साथी भएकाले प्रहरीले मुस्कान सहितको सेवा दिनुपर्ने उनले बताए ।

कार्यक्रममा अस्थायी प्रहरी पोष्टका इन्चार्ज कोमलराज बोहराले अबका दिनमा स्थानीयलाई शान्ति सुरक्षा दिने जिम्मा प्रहरीको रहेको भन्दै राम्रो काम गरेर अगाडि बढ्न आग्रह गरे । जनताको सेवाको लागि सधैं खट्न सजिलो होस भनेर मोटरसाइकलको चाबी समेत हस्तान्तरण गरिएको छ ।

१ सय ५ घरधुरी रहेको छिल्लीकोटले धेरै वर्षपछि प्रहरी पाएको भन्दै स्थानीय खुशी भएका छन् । पहिलेका दिनमा घुम्न आएका पर्यटकले त्यहाँका संरचना भत्काउने, तोडफोड गर्ने गरेकोमा अब यस्ता समस्या प्रहरीले समाधान गर्ने स्थानीयको भनाइ छ । समुदायको विकासको लागि प्रहरीको भूमिका महत्वपूर्ण हुने उनीहरुले विश्वास लिएका छन् ।

तुलसीपुर– १९ का वडा अध्यक्ष प्रेमनाथ योगीले आफ्नो वडाको पर्यटकीय क्षेत्रलाई सुरक्षित गर्नका लागि प्रहरी पोष्ट स्थापना गर्न सकेकोमा खुशी व्यक्त गरे । स्थानीयहरुलाई अब ढुक्क भएर प्रहरीलाई सहयोग गर्न आग्रह गरे । जिल्ला प्रहरी कार्यालय दाङका एसपी विरबहादुर ओली,ईलाका प्रहरी कार्यालय तुलसीपुरका डिएसपी पुष्पराज मल्ललगायते पनि मन्तव्य व्यक्त गरेका थिए ।