खोज

दाङ, १५ वैशाख

दाङको राप्ती गाउँपालिका –८ सिसहनियामा किसानको सुविधाका लागि कृषि एम्वुलेन्स र कृषि उपज संकलन केन्द्र संचालन गरिएको छ । सोही कार्यक्रममा लुम्बिनी प्रदेशका निवर्तमान भौतिक पूर्वाधार बिकास मन्त्री इन्द्रजित थारुले किसानले उत्पादन गरेको बस्तुलाई बिक्रीका लागि सहज होस् भनेर कृषि एम्वुलेन्स र कृषि उपच संकलन केन्द्र संचालन गरिएको बताए ।

राप्ती गाउँपालिका र समग्र देउखुरीका किसानले उत्पादन गरेको कृषि वस्तु बजारीकरणमा सहजीकरण गर्नलाई कृषिको क्षेत्रलाई प्राथमिकतामा रहेको बताए । “सिँचाइको व्यबस्था राप्तीमा राम्रो छ, यहाँका किसानलाई सिचाइको लागि प्रगन्ना सिचाइ सुबिधा रहेको छ , उत्पादित बस्तुको बजारीकरणको समस्यालाई समाधान गर्नका लागि काम गरेको हो”– मन्त्री थारुले भने । प्रदेश सरकारले स्थानीय तहलाई सहयोग गरेर काम गरेको हो । “आफ्नै उत्पादन बजारीकरण गर्ने नीति ल्याएको छ सोही नीतिका आधारमा किसानलाई प्राथमिकतामा राखेको हो” उनले भने । “स्थानीय उत्पादनलाई बजारमा लैजानु पर्छ, बाहिरी देशबाट आएका बस्तुलाई निरुत्साहीत गर्ने उद्देश्यले कृषि एम्वुलेन्स र कृषि उपज संकलन केन्द्र संचालन गरेको हो । लुम्बिनी प्रदेश सरकारले राजधानी व्यवस्थित गर्नका लागि जग्गा विकास कार्यक्रममा केही भ्रमहरु सृजना भएको बताए । जमिनको चक्लाबन्दी गर्दा ल्यान्डपुलिङको अवधारणाका साथ अगाडि बढेको बताए । कृषिलाई प्रविधिमैत्री बनाउँदै आत्मनिर्भर बनाउने उद्दे्र्रश्य रहेको उनको धारणा थियो ।

राप्ती गाउँपालिकाका अध्यक्ष प्रकाश विष्टले पालिका भित्रका किसानले तरकारी बिक्रीका लागि लाग्ने दिनभरीको समय बचत हुने बताए । उनले किसानलाई बिषादी रहित तरकारी उत्पादन गर्न अनुरोध गरे । “अर्गानिक तरकारी उत्पादन गरेर वजारमा ल्याउनुहोस् बिक्रीको कुनै समस्या हुने छैन,” कम्तीमा तीन कट्ठा भन्दा बढी जमिनमा तरकारी खेती गर्ने किसानलाई कृषि एम्बुलेन्सको सुविधा दिने पालिकाको कार्यविधि रहेको उनले बताए । राप्तीका प्रत्येक वडामा नमूना खेती गरेर आत्मनिर्भर हुन सबैलाई आग्रह गरे ।

राप्ती गाउँपालिकाका प्रमुख प्रशासकीय अधिकृत नेत्रबहादुर वलीले राजधानी निर्माणसंगै व्यवस्थित वजार र उत्पादित वस्तु व्यवस्थापन गर्न लागिएको बताए । तरकारी सडक पेटीमा होइन निर्धारण गरिएको स्थानमा बिक्री गर्न आग्रह गरे । प्रदेश सरकारको बिशेष अनुदानमा १५ लाख रुपैयाँ र पालिकाको १८ लाख रुपैयाँ अन्य रकम गरेर ३३ लाख रुपैयाँमा भवन र एम्वुलेन्स खरिद गरिएको उनले बताए । स्टल निःशुल्क रहेको छ, शौचालय र अटोपार्किङको न्युनतम शुल्क लिने प्रमुख प्रशासकीय अधिकृत वलीले बताए ।

कृषि उत्पादनका क्षेत्रमा देउखुरी उर्वर भूमि मानिन्छ । यहाँ सिचाइको सुविधा भएकाले बाह्रै महिना खेतीपाती हुने गर्दछ । कृषि एम्वुलेन्स र कृषि उपज संकलन केन्द्र संचालनमा आएपछि यहाँका किसान् खुशी भएका छन् ।