खोज

सुनवल, १३ बैशाख ।

उद्योग वाणिज्य तथा आपुर्ति मन्त्री रमेश रिजालले नेपालमा लगानी मैत्री वातावरण रहेकाले विदेशी लगानी उल्लेख्य रुपमा वृद्धि हुने अपेक्षा व्यक्त गरेका छन् । बुधवार पश्चिम नवलपरासीको रामग्राम ११ मा गोल्छा गु्रपले संञ्चालनमा ल्याएको सामसुङ्ग ब्रान्डको टेलिभिजन उत्पादन प्लान्टको उद्घाटन गर्दे मन्त्री रिजालले स्वदेशी तथा विदेशी लगानीकर्तालाई बिना हिचकिचाहट लगानी गर्न आह्वान गरे । सरकारले लगानी भित्र्याउन उच्च प्राथमिकतामा राखेर काम गर्दै आएको बताउँदै उनले थप आवश्यक नीतिगत तथा कानुनी प्रबन्ध गरेर लगानी मैत्री र उद्योगमैत्री वतावरण तयार पारिने बताए ।

कार्यक्रममा रामग्राम नगरपालिकाका नगर प्रमुख धनपत यादवले तीन तहका सरकारका बीचमा आवश्यक समन्वय नहुँदा उद्योग धन्दा खोल्न र सञ्चालन गर्न नीतिगत रुपमा समस्या हुने गरेको भन्दै मन्त्री रजालको ध्यानाकर्षण गराएका थिए । रामग्राम नगरपालिका उद्योगमैत्री पालिका रहेको बताउँदै उनले नगरपालिकाले उद्योगधन्दा सहज रुपमा चल्ने वातावरण बनाउन र रोजगार सृजना गर्ने पक्षमा काम गर्न सदैव तयार रहेको बताए । नगर प्रमुख यादवले उद्योगीहरुलाई, उद्योगहरुले सामाजिक हितमा खर्च गर्नुपर्ने रकम पर्याप्त खर्च नगरेको बताउदै नगरपालिका संग सहकार्य गरेर अगाडी बढ्न आग्रह गरे ।

नेपालका लागि कोरियाली राजदुत जोङसोङ पार्कले नेपाल र कोरियाको व्यापार साझेदारीले दुवै देशको व्यापार प्रवद्र्धनमा महत्वपूर्ण टेवा पुग्ने विश्वास व्यक्त गरे । नेपालले उत्पादनमूलक उद्योग स्थापनामा जोड दिनुपर्ने बताउँदै राजदुत पार्कले त्यसमा कोरिया लगानी गर्न तयार रहेको बताए ।

गोल्छा गु्रपका अध्यक्ष तथा उद्योग वाणिज्य महासंघका निवर्तमान अध्यक्ष शेखर गोल्छाले अर्थतन्त्र धरासायी बन्दै गएको अवस्थामा सरकार र निजी क्षेत्र सहकार्य गरेर अगाडि बढ्नुपर्ने बताए । .सरकार र निजी क्षेत्र गम्भीर नबने अर्थतन्त्र थप संकट तर्फ उन्मुख हुन सक्ने भन्दै उनले उत्पादनमुलक उद्योग स्थापनामा प्रोत्साहन गर्नुपर्ने बताए ।

शिलान्यास गरेको सात महिनाको अवधिमा परीक्षण उत्पादन सकेर गोल्छा गु्रपले नेपालमै पहिलो पटक सामसुङ्ग टेलिभिजनको एसेम्बल उत्पादन सुरु गरेको हो । ३२ देखि ८५ इन्च सम्मका टेलिभिजन बन्ने सामसुङ्ग प्लान्टको एक पटकमा एक हजार ओटा टेलिभिजन उत्पादन गर्ने क्षमता छ । बजाज मोटरसाईकल लगायत विभिन्न ईलेक्ट्रोनिक समानको उत्पादन गर्दै आएको गोल्छा ग्रुप अन्तर्गतको हुलास अटोक्राफ्टले अहिले सामसुङ्ग टेलिभिजनको पनि उत्पादन सुरु गरेको हो । उक्त प्लान्टको सात महिना पहिले तत्कालीन सञ्चार मन्त्री दिलेन्द्र प्रसाद बढुले शिलान्यास गरेका थिए ।