खोज

बुटवल ,९ बैशाख ।
नेपाल स्वास्थ्य प्राविधिक संघ(पान), रुपन्देहीको १२ औं जिल्ला अधिवेशन लाई सम्बोधन गर्दै शनिबार लुम्बिनी प्रदेश सरकारका स्वास्थ्य मन्त्री विष्णु पन्थीले नेपालमै उपचार संभव भएका बिरामीले देशमै उपचार गर्नुपर्ने बताएका छन् ।
“अचेल उपचारका नाउँमा बिदेश जाने चलन बढेको छ, उपचार असम्भव नै भए विदेश जानुपर्ला तर सम्भव भएसम्म नेपाल कै स्वास्थ्य जनशक्ति र अस्पतालको विश्वास गर्नुपर्छ ।“– पन्थीले भने ।
नेपालको स्वास्थ्य प्रणालीमा नेपाल स्वास्थ्य प्राविधिक संघको अतुलनीय योगदान रहेको बताउँदै मन्त्री पन्थीले पान पुरानो इतिहास बोकेको संस्था रहेको र समय सापेक्ष रचनात्मक गतिविधि निरन्तरता दिनुपर्ने बताए ।
अधिवेशनलाई सम्बोधन गर्दै लुम्बिनी प्रदेश स्वास्थ्य मन्त्रालयका सचिव डा. विनोद कुमार गिरीले नेपाल स्वास्थ्य प्राविधिक संघ नेपालको स्वास्थ्य क्षेत्रको जग रहेको बताए । डा. गिरीले नेपाल स्वास्थ्य प्राविधिक संघ सबैको साझा संस्था रहेको र आगामी दिनमा पनि रहिरहने विश्वास व्यक्त गरे । नेपाल स्वास्थ्य प्राविधिक संघका केन्द्रीय अध्यक्ष बसन्त कुमार श्रेष्ठले संघको स्थापना,लक्ष, उदेश्य र संघले गरेका गतिविधि माथि प्रकाश पारे । नेपाल स्वास्थ्य प्राविधिक संघले स्वास्थ्य क्षेत्रमा मात्रै होइन राजनीतिक परिवर्तनको आन्दोलनमा उल्लेख समेत भूमिका खेलेको श्रेष्ठले दाबी गरे ।
लुम्बिनी प्रादेशिक अस्पतालका मेडिकल सुपरिटेन्डेन्ट डा. सुदर्शन थापाले स्वास्थ्य प्राविधिकको साथ बिना स्वास्थ्य क्षेत्र अगाडि बढ्न नसक्ने बताए । नेपाल स्वास्थ्य प्राविधिक संघका केन्द्रीय सचिव अमृत भुसालले स्वास्थ्यकर्मीलाई योग्यता अनुरुपको पारिश्रमिकको व्यवस्था नहुँदा हरेक दिन बिदेश जानेहरूमा अधिकांश स्वास्थ्य क्षेत्रका रहेको बताउँदै देशमै पेशागत सुनिश्चितता कायम हुनुपर्ने बताए । राष्ट्रिय आयुर्वेद एसोसिएसनका शालिकराम भुसाल, पूर्व अध्यक्ष बाबुराम भट्टराई लगायतले शुभकामना मन्तव्य व्यक्त गरेका थिए ।
जिल्ला अध्यक्ष बुद्धि बहादुर घर्ती, जिल्ला उपाध्यक्ष उपेन्द्र अर्याल, सचिव गणेश भट्टराई लगायतले शुभकामना दिएका थिए । जारी अधिवेशनले नयाँ जिल्ला कार्यसमिति चयन गर्नेछ ।