खोज

बुटवल, ८ बैशाख ।

माक्र्सवादी ज्ञान केन्द्रको आयोजनामा ‘समाज रूपान्तरणको पाठशाला’ नामक खोज तथा अनुसन्धान सहजीकरण कार्यशाला बुटवलमा सम्पन्न भएको छ ।

माक्र्सवादी ज्ञान केन्द्र लुम्बिनी प्रदेशको व्यवस्थापनमा बुटवलमा आयोजित उक्त कार्यशाला दुई दिन सञ्चालन भएको थियो । सांस्कृतिक प्रवद्र्धन गर्ने उद्देश्यले आयोजना गरिएको उक्त कार्यशालामा सांस्कृतिक सम्पदालाई आयआर्जनमा जोड्ने मुख्य बिषय रहेको थियो ।

समापन कार्यक्रमलाई संबोधन गर्दै संघ सरकारका संस्कृति पर्यटन तथा नागरिक उड्डयन राज्यमन्त्री सुशिला श्रीपालीले समृद्धिको आधार सम्पदा र संस्कृतिको संरक्षण गरी समुदाय सङ्ग जोड्दै ब्यवसायीकरण गर्नुपर्ने बताईन् । “नेपाल कला संस्कृतिमा विश्वकै नमुना देश भएकाले यसलाई संरक्षण र संवद्र्धन गरी बाह्य पर्यटक नेपाल भित्र्याउन सकेमात्र थिचिएको अर्थतन्त्रमा केही सुधार हुनसक्छ यसका लागि हामी सांस्कृतिक सम्पदाको खोजी र संरक्षणमा निरन्तर लाग्नु पर्छ”– उनले भनिन् ।

कार्यशालामा उठेका विषयहरू र सांस्कृतिक सम्पदालाई अर्थतन्त्रमा कसरी जोड्न सकिन्छ भन्ने विषयमा प्राप्त सुझावका आधारमा प्रतिवेदन तयार पारिने माक्र्सवादी ज्ञान केन्द्रका वरिष्ठ उपाध्यक्ष विशेश्वर कट्टेलले जानकारी दिनुभयो । उहाँले उक्त प्रतिवेदन नेपाल सरकारलाई बुझाउने बताउनुभयो । यसले सरकारलाई आवश्यक नीति निर्माणमा सहयोग पुर्याउने उपाध्यक्ष कट्टेलको बताउनुभयो ।

नेपाली समुदायमा रहेका सँस्कृति सम्पदा र तिनका पहिचानका आधारहरु, नेपालका साँस्कृतिक अर्थशास्त्र र उदीयमान समाजवादी क्रान्ति, मुर्त र अर्मूत साँस्कृतिक सम्पदा र तिनीहरुको अवधारणा, सहित सांस्कृतिक सम्पदालाई आयआर्जनसँग जोड्न खोज तथा अनुसन्धान गर्ने गरी विषय विज्ञ डा. निमानन्द रिजाल, विश्वेश्वर कट्टेल केन्द्रीय सचिव हुमनाथ कार्यशाला सहजीकरण गरेका थिए ।

समापन सत्रको अध्यक्षता मार्क्सवादी ज्ञान केन्द्र लुम्बिनी प्रदेश कमिटी उपाध्यक्ष नरबहादुर जिसि तथा संचालन हुमानाथ न्यौपाने (सुदिप) ले गरेका थियो । कार्यशालामा लुम्बिनी प्रदेशबाट ४५ जना सहभागी रहेका थिए ।