खोज

बाँके, ६ बैशाख ।

भिटामित ए क्याप्सुलको भण्डारणमा स्वास्थय कार्यालय बाँकेको गम्भीर लापरवाही पाइएको छ । भण्डारणमा भएको लापरवाहीले क्याप्सुलको रङमा परिवर्तन आएपछि अन्तिम समयमा बाँकेमा भिटामिन ए क्याप्सुल खुवाउने कार्यक्रम नै स्थगीत गरिएको छ ।

म्याद सकिएकै महिनामा बाँकेमा बालबालिकालाई खुवाउने तयारी गरिएको भिटामिन ए कार्यक्रम अन्तिम अवस्थामा स्थगित गरिएको हो । वितरण गरिएको भिटामिन ए को क्याप्सुलको रङ्गमा परिवर्तन आएपछि प्रदेश स्वास्थ्य निर्देशनालयको निर्देशनमा कार्यक्रम स्थगित गरिएको हो ।

२०२३ अप्रिलमा म्याद समाप्त हुने मिति भएको भिटामिन ए आजदेखि बालबालिकाहरुलाई खुवाइने तयारी गरिएको थियो । स्वास्थ्य कार्यालयले जिल्लाभरीका स्वास्थ्य केन्द्रहरुमा पठाइएको भिटामिन ‘ए’ क्याप्सुलमा केही दाग जस्तो देखिएको तथा फरक फरक रङ्ग देखिएपछि स्वास्थ्य स्वयम्सेविकाहरुले प्रदेश स्वास्थ्य निर्देशनालयमा खबर गरेका थिए । खबर आए लगत्तै निर्देशनालयले कार्यक्रम स्थगित गर्न निर्देशन दिएको हो ।

बालबालिकालाई खुवाइने भिटामिन ए जस्तो संवेदनशील भ्याक्सिन नेपालगन्जको चर्को घाममा भण्डारण गरिएका कारण ड्यामेज भएको स्रोतले दाबी गरेको छ । गोदाम र निश्चित तापक्रममा राखिनुपर्ने भिटामिन क्याप्सुल केहीदिन देखि गोदाम बाहिर खुल्ला घाममा राखिएको स्रोतको दाबी छ ।

सामान्यतया म्याद सकिएको महिनाको औषधी प्रयोगमा नल्याउने परम्परा विपरित स्वास्थ्य कार्यालयले म्याद सकिएको महिनामा भिटामिन खुवाउने तयारी गरेको एक स्वास्थ्यकर्मीले बताए । खोपको म्याद पनि चालु महिना सम्म मात्र रहेकाले म्याद नाघेको पनि हुन सक्ने अनुमान उनले गरे ।

स्वास्थ्य निर्देशनालयका निमित्त निर्देशक रामजनम कुर्मीले वितरण गरिएको भिटामिन ए को क्याप्सुलको रङ्गमा परिवर्तन आएकोले नखुवाउन र सबै स्वास्थ्य कार्यलय बाँकेमा भन्डार गर्न आग्रह गरेका छन् । उनले ४० हजार पुरानो क्याप्सुल विभिन्न पालिकाहरुमा खुवाउने क्रम जारी रहेको र क्याप्सुलको रंगमा आएको परिवर्तनका कारण रोकिएका ठाउँहरुमा नयाँ ४० हजार क्याप्सुल पठाइसकिएको र ४ बजेसम्म सम्बन्धित ठाउँमा पुगिसक्ने जानकारी दिए ।