खोज

बुटवल, ५ बैशाख ।

‘रक्तदान–मानव जीवनमा अतुलनीय, अनुकरणिय काम’ नारासहित नेपाल स्वयंसेवी रक्तदाता समाजको चौथो अधिवेशन बुटवलमा हुने भएको छ । मंगलबार बुटवलमा पत्रकार सम्मेलन गरी बैशाख १६ र १७ गते दुई दिन समाजको केन्द्रीय अधिवेशन हुने केन्द्रीय अध्यक्ष प्रेम सागर कर्माचार्यले बताए । लुम्बिनी प्रदेश बुद्धजन्मस्थल र शान्तिका रुपमा रहेको भन्दै उनले रक्तदान अभियानमा जुटेका अभियन्ताहरुको केन्द्रिय अधिवेसन महत्वपूर्ण हुने बताए ।

हालसम्म १ सय ७३ पटक रक्तदान गरेका कर्माचार्य शताब्दी रक्तादाताका रुपमा परिचित छन । आफ्नो अनुवाईमा रक्तदान अभियानका स्वयंसेवीहरु जोडेर संस्था स्थापना गरेको उनले बताए । संस्थागत रुपमा उठाएका मुद्दाहरु सरकारबाट सम्बोधन गराउन सहज र सफल हुने उनको दाबी छ । रगतको समस्याको विषयमा धेरै कठिनाई पार गर्दै अहिलेको अवस्थामा पुगेको उनले बताए । धेरै प्रदेश सरकारसंगै संघीय सरकार माझ रगतको वर्तमान अवस्था र समस्याबारे जानकारी दिने काम भएको उनले दाबी गर्दै थप दबाबका कार्यक्रम चलाउदै आएको बताए । रक्तदाताहरुले निशुल्क रगतको मूल्य बिचौलियाहरुबाट बिल काटेर बेच्ने काम भैरहेको उनले दाबी गरे । एकलौटी रुपमा नेपाल रेडक्रस सोसाइटीबाट रगत ब्यवस्थापन भईरहेको भन्दै सरकारबाट २५ बेडसम्मका अस्पतालले ब्लड बैक खोल्न पाउने भनिएपनि त्यो अघि बढ्न सकेको छैन ।

कार्यक्रममा रुपन्देही शाखाको अध्यक्ष तथा अधिवेशन संयोजक कृष्ण चौहान क्षेत्रीले नमुना जिल्लाको पहिचान बनाएको रुपन्देहीमा केन्द्रीय अधिवेशनको तयारी भईरहेको बताए । प्रत्येक शनिबार नियमित रक्तदान अभियान मार्फत १ सय २१ पटक आयोजना गरी २५ हजार युनिट रगत संकलन गर्न सफल भएको उनले बताए । रक्तदाताबाट निःशुल्क रगतको बिरामीले मुल्य तिर्नुपर्ने अवस्थाको अन्त्यका लागि अभियान चलाएर धेरै स्थानीय, प्रदेशमा सफल भएको उनले दाबी गरे । ‘सबैले निःशुल्क पाउने गरी अभियान थालेको छ ।’–उनले भने । यसका लागि स्वयंसेवी रक्तदाताहरुको अगुवाईमा ब्लड बैक खोल्न अभियानलाई अघि बढाएको उनले बताए ।

समाजका केन्द्रीय उपाध्यक्ष ध्रुव थपलियाले आफनो परिवारको साथ सहयोयमा अहिलेसम्म १ सय १० पटक रक्तदान गरेका बताए । सामाजिक कार्यमा अग्रसर हुन परिवारको साथसहयोग महत्वपूर्ण हुने भन्दै उनले ब्यक्तिको सोच सकारात्मक बन्न सकेमात्र आम नागरिकको पिडा कम हुने बताए । संघिय सरकारबाट रगतको निशुल्क गराउन दबाब दिने गरि अभियान थाल्नुपर्ने भन्दै २५ करोड वर्षमा बजेट बिनियोजन गरे देशमै रगत निःशुल्क हुने तर्क दिए । नेपाल रेडक्रस सोसाइटी, रक्तसंचार केन्द्रले एक पोका रगतमा २ सय ८७ रुपैया खर्च गरेर ९ सय ७५ रुपैया बिरामीसंग लिने गरेको उनले दुःखेसो गरे ।
अधिवेशनमा ३४ जिल्लाबाट ९० जना सहभागी हुने छ । समाजको ३४ जिल्ला शाखा, नगरपालिका, गाउपालिका, वडा ईकाई गरी ७७ वटा गठन भएर सेवामा जुटेका छन् ।