खोज

दाङ, ३ वैशाख ।

दाङको शान्तिनगर गाउँपालिकामा एसईई दिईरहेकी बालिकामाथि भएको जबरजस्ती करणीको घटनामा संलग्नलाई तत्काल पक्राउ गरी कानुन अनुसार कारवाही गरी पीडितलाई उचित क्षतिपूर्तिको व्यवस्था गर्न नेकपा एमालेसहित भातृ संगठनले माग गरेको छ ।

अखिल नेपाल महिला संघ केन्द्रीय कमिटी उपाध्यक्ष मेनका पोख्रेलको नेतृत्वमा ज्ञापन पत्र बुझाउन गएको टोलीले दाङका प्रमुख जिल्ला अधिकारी सुशील वैद्यमार्फत आइतबार प्रधानमन्त्री तथा मन्त्रिपरिषदको कार्यालय, सिंहदरवार काठमाडौलाई घटनाका बारेमा गम्भीर ध्यानाकर्षण गराएको छ ।

पेश गरिएको ज्ञापन पत्रमा २०७९ साल चैत २० गतेका दिन एसईई दिइरहेकी शान्तिनगर गाउँपालिका वडा नम्बर ६ शिवशक्ति मावि धनौरीमा अध्ययनरत १६ वर्षीया बालिकालाई सोही विद्यालयका शिक्षक खुमानन्द पौडेलले जबरजस्ती करणी गरेको र हालसम्म पक्राउ समेत नभएकाले दोषीलाई तत्काल पक्राउ गरी कानुन बमोजिम कारवाही गरी पीडितलाई उचित क्षतिपूर्तीको व्यवस्था गर्न जोडदार माग गरेको छ ।

सामाजिक, सांस्कृतिक, राजनीतिक, आर्थिक दृष्टिकोणले महत्वपूर्ण जिल्लाका रुपमा दाङ चिनिने भए पनि समाजमा रहेको विभेद, अन्याय अत्याचार, शोषण दमन, उत्पीडन, विकृती, विसंगतीको अन्त्य र समतामुलक समाज निर्माण चुनौती रहेको ज्ञापन पत्रमा उल्लेख छ ।

समाजको सकारात्मक रुपान्तरणको पक्षमा निरन्तर लागिरहँदा पनि समुन्नत, सुसंस्कृत एवं कानुनी राज्य निर्माणको कोशिस भईरहँदा समाजले सोचे जस्तो न्यायमूलक सामाजिक वातावरण निर्माण हुन नसेको तथ्यले घटनाहरु हुने गरेको तर्फ ध्यानाकर्षण गराईएको छ ।

दाङमा पछिल्लो समयमा घटेका घटनाक्रमले सभ्य समाजलाई कुरुप कलंकित र लज्जित बनाएको स्मरण गराउँदै यस प्रकारका घटनाक्रमलाई सबैले गम्भिरतापूर्वक नियाल्दै दोषीलाई कानुनको दायरामा ल्याउन पहलकदमी आवश्यक रहेको ज्ञापन पत्रमा उल्लेख छ । यसैगरी, यस वर्षको खेतीको समय सुरु हुन लाग्दा समेत रासायनिक मलको चरम अभाव देखा परेकाले आम किसानहरुलाई सर्वसुलभ तरिकाले रासायनिक मल उपलब्ध गराउन पनि सम्बन्धित निकायसँग माग गरेको छ ।

ज्ञापनपत्र बुझ्दै प्रमुख जिल्ला अधिकारी सुशील वैद्यले घटनाका विषयमा अनुसन्धानको प्रकृया अघि बढेको र दोषीको खोजी कार्य जारी रहेको जानकारी गराउँदै प्राप्त ज्ञापन पत्र तत्काल केन्द्रमा पठाउने बताए । ज्ञापन पत्र बुझाउन अनेमसंघकी केन्द्रीय उपाध्यक्ष पोख्रेलसहित नेकपा एमाले केन्द्रीय कमिटी सदस्य दीपा शर्मा, अनेम संघ केन्द्रीय सदस्य तुलसा केसी, नेकपा एमाले जिल्ला कमिटी दाङका सचिव मनोहर बुढाथोकी, अनेमसंघ दाङकी अध्यक्ष हुमा डिसी, उपाध्यक्ष लक्ष्मी शर्मा, अनेम संघकी क्षेत्र संयोजक तुलसा पोख्रेल, सदस्य सरस्वती खत्री, नेकपा एमाले घोराही नगर उपाध्यक्ष तारा पुरीलगायतको सहभागिता रहेको थियो ।