खोज

दाङ, ३ वैशाख ।

सामुदायिक विद्यालयमा अध्ययनरत विद्यार्थीहरुका लागि चाहिने पाठ्यपुस्तक दाङमा सहज रुपमा पाइन थालेको छ । चैत अन्तिमबाट पाठ्यपुस्तक जिल्ला आउन शुरु गरेको दाङ देउखुरी पुस्तक तथा स्टेशनरी व्यवसायी समितिका अध्यक्ष शंकर शर्माले जानकारी दिए । उनका अनुसार, बैशाख ३ गते (आज) बाट यो वर्षको शैक्षिक सत्र सुरु हुन लागेका बेलामा कक्षा १ देखि ५ सम्मका लागि केही विषय बाहेक अधिकांश पुस्तक जिल्लामा आईपुगेको छ ।

जिल्लाका सबै सामुदायिक विद्यालयहरुका लागि घोराही क्षेत्रमा हिमाल बुक्स एण्ड स्टेशनरीबाट, तुलसीपुरमा डाँगी स्टेशनरीबाट, नारायणपुर क्षेत्रमा प्रतिभा पुस्तकबाट र लमही क्षेत्रमा छायाँछवि पुस्तक डिपोबाट पुस्तक बिक्री भईरहेको छ ।

अध्यक्ष शर्माले कक्षा ५ सम्मका विद्यार्थीका लागि करिव ५० प्रतिशत पुस्तक जिल्लामा आईपुगेको बताए । उनका अनुसार, कक्षा ४ र ५ को पुरै सेट किताव जिल्लामा आई पुगेको भएपनि कक्षा १ को ४ वटा पुस्तक पुस्तकमध्ये अंग्रेजी आएको छैन । कक्षा २ को ४ पुस्तकमध्ये सेरोफेरो पुस्तक आईपुगेको छैन । यसैगरी, कक्षा ३ को ४ किताब मध्ये हालसम्म गणित र सामाजिक विषयको पुस्तक आईपुगेको छैन ।

कक्षा ६ देखि १० सम्मको पुस्तक पनि अझै जिल्लामा आईपुगेको छैन । पुस्तक व्यवसायी समितिका अनुसार, कक्षा ६ देखि १० सम्मका लागि आज आइतबार नेपालगंजबाट जिल्लाका लागि पुस्तक आउने भएको छ । ‘कक्षा ६, ७, ८, ९ र १० को आइतबार किताब आउने भएको छ’, अध्यक्ष शर्माले भने, ‘कोटा प्रणालीका आधारमा पुस्तक वितरण हुने गरेको छ । पहिले पहाडी क्षेत्रमा पुस्तक पठाईएको छ, अब सुगम जिल्लामा पुस्तक पठाउने तयारी भएअनुसार दाङको पालो आएको हो । जिल्लामा विगत वर्षमा भन्दा यो पटक केही सहज रुपमा पुस्तक पाईन्छ की भन्ने अपेक्षा हो तर अझै भन्न सकिने अवस्था छैन ।’

पुस्तक आलोपालो प्रणालीमा वितरण गर्नुपर्ने अवस्था रहेकाले एकै पटक सहज रुपमा पुस्तक पठाउन समस्या रहेको उनले बताए । सामुदायिक विद्यालयका लागि जनक शिक्षा तथा सामग्री केन्द्रले पुस्तक प्रकाशन गर्ने हुँदा सबै कक्षाको पुस्तक छपाईमा पनि ढिलाई भएको पुस्तक व्यवासायीको भनाई छ ।

हिमाल बुक्स एण्ड स्टेशनरी घोराहीका संचालक प्रेम डाँगीले यो वर्ष कक्षा ५, ८ र १० को ऐच्छिक विषय बाहेक सबै पुस्तकको पाठ्यक्रम परिवर्तन भएपछि नयाँ पुस्तक आउन ढिलाई हुने भएको बताए । ‘पाठ्यक्रम नै परिवर्तन भएको बेलामा समय मै पुस्तक छपाई गर्नुपर्ने भएपनि अहिलेसम्म पुस्तक छपाई नहुनुले समयमा विद्यार्थीको हातमा पुस्तक पुग्नेमा यो वर्ष पनि शंका छ’, उनले भने, ‘प्रकाशन गृहमा बुझ्दा छपाईका लागि समय लाग्ने जवाफ आउने गरेको छ ।’

हालसम्मको अवस्था अनुसार दाङमा सामुदायिक विद्यालयका लागि तल्लो कक्षाबाट पुस्तक आउन सुरु गरेको छ । सामुदायिक विद्यालयमा अंग्रेजी, सामाजिक र नेपाली साविककै लागू हुने भएपनि अंग्रेजी माध्यमको कन्भरसेसन कितावहरु ५ देखि १० कक्षासम्मको अवस्थाका बारेमा जनक शिक्षा सामग्रीले चासो लिएको छैन । जिल्लामा सबै विद्यालयको संख्या ६ सय ३० बढी रहेको तथ्यांक छ ।

संस्थागत विद्यालयहरुका लागि पनि विभिन्न प्रकाशनका पुस्तक बजारमा आईपुगेको बताईएको छ । यद्यपि, संस्थागत विद्यालयहरुले कुन प्रकाशनको पुस्तक यो वर्ष लगाउने भन्ने टुंगो लगाई नसकेकाले पुस्तक बिक्री हुन नसकेको बताईएको छ । आजबाट जिल्लामा शैक्षिक सत्र शुरु हुन लागेकाले यसको पनि टुंगो लाग्ने पुस्तक व्यवसायीको भनाई छ ।