खोज

बुटवल, २ बैशाख ।

टोलबासीलाई संगठित गर्दै सामाजिक कार्यमा अग्रसर संजिवनी टोल विकास संस्थाले ९ औ नियमित रक्तदान कार्यक्रम गरेको छ । नेपाली वर्ष २०८० को अवसर पारेर ‘रक्तदान जीवनदान, जीवनदान महादान’ नारासहित नेपाल रेडक्रस सोसाईटी रक्तसञ्चार केन्द्र बुटवलको प्राविधिक सहयोगमा शनिबार संस्थाले रक्तदान कार्यक्रम गरेको हो । एक समारोहका बीच बुटवल उपमहानगरपालिकाकी उपप्रमुख सावित्रा अर्यालले कार्यक्रमको उदघाटन गर्दै घर घरमा जागरण ल्याउने काम टोल विकास संस्थाको योगदान महत्वपूर्ण हुने बताईन् । नगर विकासको योजनालाई बनाईएका अभियान सफल गर्न टोल संस्थाहरुको लाग्नुपर्ने उनले बताईन् ।

कार्यक्रममा संजिवनी टोल बिकास संस्थाका अध्यक्ष क्या. देवबहादुर थापाले संस्थाको नियमित सामाजिक गतिविधिमा अग्रसर रहेको बताए । रगत अभावलाई सहयोगी हुने गरी विगत वर्षदेखि नियमित रक्तदान कार्यक्रममा जोड दिदै आएको उनले बताए ।

कार्यक्रममा नेपाल स्वयंसेवी रक्तदाता समाज कृष्ण चौहानले रगतको महत्व र वर्तमान अवस्थाबारे प्रकाश पारेका थिए । कार्यक्रममा वडा नं ११ का कार्यवाहक वडाअध्यक्ष माया दर्नाल, नवीन टोलका अध्यक्ष बिष्णु थापा, मेलमिलाप सरोकार केन्द्र बुटवल–११ लक्ष्मण ज्ञवाली, सल्लाहकार नरेन्द्र कुमार शर्माले सामाजिक कार्यमा हातेमालो गर्दै अघि बढ्ने अभियानको थालनी भएको बताए । कार्यक्रममा ६ महिला र ३५ पुरुष रक्तदाताबाट ४१ युनिट रगत संकलन भएको संयोजक हरि गहतराजले बताए ।