खोज

दाङ, २ वैशाख ।

नेपाल पत्रकार महासंघका केन्द्रीय उपाध्यक्ष उदय जिएमले नेपाली पत्रकारितामा घुसपैठ बढ्दै गएको हुँदा सचेत हुन आवश्यक रहेको बताएका छन् । नयाँ वर्ष २०८० को अवसरमा नेपाल पत्रकार महासंघ दाङ शाखाले शनिबार घोराही १३ बाह्रकुने दहमा आयोजना गरेको शुभकामना आदान प्रदान तथा वनभोज कार्यक्रमलाई सम्बोधन गर्दै उपाध्यक्ष जिएमले यस्तो धारणा राखेका हुन् । हिजोका दिनमा हुने आन्दोलनमा विभिन्न शक्ति केन्द्रहरुको घुसपैठ भएजस्तै अहिले नेपाली मिडियामा विभिन्न नाममा अराजक तत्वको घुसपैठ बढेको बताए ।

उनले नेपाली पत्रकारितालाई मर्यादित, विश्वसनीय र उत्तरदायी बनाउने क्रममा मिडियामाथिको विश्वसनीयता कमजोर बनाउन पत्रकारितामा मण्डले प्रवृति हावी हुँदै गएको होकी भन्ने अवस्था सिर्जना भएको हुँदा सिंगो संचारमाध्यम यस विषयमा गम्भीर हुन जरुरी रहेको बताए ।

पत्रकारिताको मूल्य, सिद्धान्त बचाउन तथा मिडिया क्षेत्र विकृत हुनबाट जोगाउन व्यावसायिक पत्रकारितामा निष्ठाको पत्रकारिता आवश्यक रहेको जिकिर गरे । उनले पछिल्लो समय महासंघ पत्रकारहरुको पहिचान बनाउने गरी अघि बढेको जानकारी गराउँदै संचारसम्बन्धी कानुनका विषयमा गम्भीर रुपमा अध्ययन अघि बढेको उल्लेख गरे । सञ्चार क्षेत्रमा भएका कानुनको पुनरावलोकन गर्ने, भए गरेका समस्याहरुको पहिचान गरी समाधानको उपाय निकाल्न अध्ययन समिति गठन भईरहेको जानकारी गराए । अहिले मिडिया काउन्सिल विधेयक शुन्यमा झरेको अवस्थामा मिडिया सम्बन्धी कानुन र विषय अघि बढाउन सरकारले सरोकारवालासँग समन्वय गरेर अघि बढेको हुँदा चाँडै नै यसले समग्र मिडिया क्षेत्रको हितमा काम गर्ने विश्वास व्यक्त गरे ।

पत्रकार सुदृढीकरण अभियानलाई अघि बढाउन प्रदेश र जिल्ला तहमा पनि छलफल जारी रहेको हुँदा पत्रकारितामा मूल्यहीनता, विचलन, संवेदनशीलता बलियो बनाउँदै जवाफदेही तथा सन्तुलित पत्रकारितामा लाग्न अपिल गरे ।
कार्यत्र mममा प्रेस काउन्सिल सदस्य शरद अधिकारीले मिडिया क्षेत्रमा विकृति विसंगति बढ्दै गएको हुँदा यसको नियमन हुन आवश्यक रहेको बताए । प्रेस काउन्सिलले मिडिया अनुगमन गर्ने र आचारसंहिता पालनामा भूमिका खेल्दै आएको जानकारी गराउँदै डिजिटल मिडियाका नाममा जथाभावी खुलेका मिडियाहरुका कारण पनि समग्र नेपाली मिडियाको अवस्थाका बारेमा प्रश्न उठ्ने गरेको बताए ।

सो अवसरमा, पत्रकार महासंघ दाङ शाखाका पूर्व अध्यक्ष सुशील गौतम, केबी मसाल, सुदीप गौतम, निवर्तमान अध्यक्ष सविन प्रियासन, प्रेस चौतारी दाङका अध्यक्ष ईन्द्र डिसी, प्रेस युनियन दाङका कार्यवाहक अध्यक्ष नारायण खड्का, प्रेस सेन्टर दाङका अध्यक्ष पाण्डव शर्मा, प्रगतिशील पत्रकार संघ दाङका अध्यक्ष महेश रिजाललगायतले अबको पत्रकारितालाई थप जिम्मेवार र मर्यादित बनाउन सबैले गम्भीर समीक्षा गर्न आवश्यक रहेको बताए । अबको पत्रकारिता दिगो शान्ति, स्थिरता र विकासका पक्षमा केन्द्रित हुनुपर्नेमा उनीहरुको जोड थियो । महासंघ दाङ शाखा अध्यक्ष दुर्गालाल केसीको अध्यक्षतामा भएको कार्यक्रममा महासंघका उपाध्यक्ष बसुन्धरा गौतम, सचिव आरके शीतललगायतले पनि बोलेका थिए ।