खोज

दाङ, २ बैशाख ।

नागरिकको सेवालाई बिस्तार गर्ने उद्देश्यले तुलसीपुर उपमहानगरपालिका र एनएमबि वित्तीय संस्थाबीच सम्झौता भएको छ । कृषि र उद्यमशीलताको क्षेत्रमा काम गर्नका लागि सम्झौता भएको हो । सम्झौता पत्रमा तुलसीपुर उपमहानगरपालिकाका प्रमुख टीकाराम खड्का र संस्थाका कार्यकारी निर्देशक आनन्द पाण्डेले हस्ताक्षर गरेका छन् ।

कार्यक्रममा नगरप्रमुख टीकाराम खड्काले किसानहरुलाई बिना धितो सहुलितमा ऋण, कृषकहरुको उत्पादकत्व बढाउने गरेर संस्थासंग सम्झौता गरिएको बताए । उनले सम्झौतापछि बढ्दो बेरोजगारी समस्याको अन्त्य र कृषिजन्य वस्तुको बढ्दो आयातलाई घटाउनका लागि थप सहयोग पुग्ने बताए । संस्थाका कार्यकारी निर्देशक आनन्द पाण्डेले सम्झौतामा कृषिजन्य वस्तुको बजारीकरण, वित्तीय साक्षरता, सीप दक्षता, ऋण व्यवस्थापन, कर्जा सुरक्षा र कृषकहरुलाई प्राविधिक ज्ञानको व्यवस्थापन गर्ने कुरा उल्लेख गरिएको बताए ।

तुलसीपुर उपमहानगरका कृषि शाखाका प्रमुख धनराज गौतमले बैङ्कबाट कृषि क्षेत्रमा लिएको ऋण सहीरुपमा सदुपयोग भएको अवस्थामा मात्रै किसानले उत्पादन गर्ने वस्तुमा बढ्ने र किसानको ऋण जोखिममा नपर्ने बताए । सम्झौता पत्रमा आय आर्जनका लागि व्यवसाय सञ्चालनका लागि संस्थाको नियमअनुसार कर्जा उपलब्ध गराउने, बजारको मागअनुसार उत्पादकत्व विषयमा पालिका, कृषि ज्ञान केन्द्र र संस्थाबीच समन्वय गरेर वित्तीय परामर्श दिने उल्लेख गरिएको छ । कर्जा पाउने भएपछि किसान खुसी भएका छन् ।