खोज

सुनवल, ३० चैत ।

पश्चिम नवलपरासीको सरावल गाउँपालिकाले पालिका भित्र सञ्चालनमा आएका उद्योगलाई अनुगमन प्रतिवेदन पेश गर्न ताकेता गरेको छ । वातावरणीय दृष्टिकोणले संवेदनशील उद्योग तथा आयोजनाले अनिवार्य रुपमा आगामी वैशाख ३० गते भित्र स्वअनुगमन प्रतिवेदन पेश गर्न निर्देशन दिईएको हो । उद्योगले अर्धबार्षिक स्वअनुगमन प्रतिवेदन पेश गर्नुपर्नेमा नगरेको पाइएकोले यही वैशाख ३० गते भित्र सो प्रतिवेदन पेश गर्न सूचना जारी गरेको प्रमुख प्रशासकीय अधिकृत दुर्गा पौडेलले बताए ।

प्रत्येक नगरिकको स्वच्छ वातावरणमा बाँच्न पाउने मौलिक हकलाई प्रभावकारी बनाउन सरावल गाउँपालिकाले प्रारम्भिक वातावरणीय परीक्षण कार्यविधि २०७७ जारी गरेको र सोही कार्यविधिमा उद्योग तथा आयोजनाले अर्धबार्षिक स्वअनुगमन प्रतिवेदन पेश गर्नु पर्ने प्रवाधान रहेको पौडेलले बताए । जिल्लामा उद्योग कलकारखानाबाट उत्सर्जन भएको हानीकारक धुवाँ र फोहोरपानीले वरपरको बस्तीमा उच्च जोखिम सिर्जना गरेको छ । नेपाल सरकारले स्थानीय तहलाई अनुगमनकारी निकायको रुपमा अधिकार दिएता पनि स्थानीय तहले कडाइका साथ नियमन गर्न नसक्दा उद्योगको मनपरी बढ्दै गएको छ ।

औद्योगिक फोहोर पानी र धुवाँले पश्चिम नवलपरासीका अधिकांश बस्तीहरु औद्योगिक क्षेत्र जस्तो देखिन थालेपछि सरवाल गाउँपालिकाले यस क्षेत्रमै पहिलो पटक उद्योगलाई स्वअनुगमन प्रतिवेदन पेश गर्न ताकेता गरेको हो । स्वअनुगमन प्रतिवेदनमा उद्योगले उत्सर्जन गर्ने हानीकारक धुवाँको गुणस्तर, फोहोर पानीको गुणस्तर, कामदारले पिउने पानीको गुणस्तर, ध्वनीको तह र आईईई प्रतिवेदनमा लेखेका कुराहरु पालना भए नभएको कुरा समावेश हुन्छ । प्रस्तावकले पेश गरेको स्वअनुगमन प्रतिवेदन उपर शंका उत्पन्न भएको खण्डमा गाउँपालिका स्वयंले अनुगमन गर्न सक्ने कानुनी प्रावधान रहेको छ । पालिकाले स्थानिय तहको निति नियमलाई पालना नगर्ने र अटेरी गरेको पाईएपछि समयावधि तोकेर उद्योगलाई ताकेता गरिएको हो ।