खोज

दाङ, २७ चैत ।

बिशालु सर्प मानव बस्तीमा देखापर्ने क्रम बढेको र त्यसको उद्दारमा समस्या भएको भन्दै डिभिजन वन कार्यालय दाङले तालिम संचालन गरेको छ । सर्पको उद्दारका लागि सरोकारवालालाई तालिम दिन शुरु गरेको छ । मानिसहरु बसोबास गर्ने क्षेत्रमा सर्पहरु बढ्ने गरेको, बिशालु सर्पले डसेका घटना बढेको र उद्दारमा समस्या देखिएपछि सरोकारबाला निकायलाई तालिम दिन सुरु गरिएको डिभिजन वन कार्यालय दाङले जनाएको छ ।

गर्मीयाम शुरु भएसँगै मानिसको घरभित्र सर्प पस्ने र स्थानीय त्रसित हुने घटना बढेपछि सरोकारवाला निकायमार्फत उद्दारकर्ता बढाउने काम गरिरहेको डिभिजन वनकार्यालय दाङका सूचना अधिकारी खिमबहादुर केसीले जानकारी दिए । वन, वन्यजन्तु, जैविक विविधता संरक्षण तथा ब्यवस्थापन कार्यक्रम अन्तर्गत सोमवार घोराहीमा बिषालु सर्प उद्दार तथा पुनस्र्थापनाका लागि सीप तथा प्रविधि सहयोग तालिम गरिएको छ ।

पारिस्थितिय प्रणालीमा सर्पको महत्व भएपनि मानिसले सर्प देख्नासाथ मारिहाल्ने घटना बढेपछि उद्दारमा सहयोग पुयाउनका लागि डिभिजन वन कार्यालय, नेपाली सेना, शसस्त्र प्रहरी, नेपाल प्रहरी र रेडक्रसमा आवद्ध ब्यक्तिहरुलाई सर्पको पहिचान र उद्दारको सिपका बारेमा दाङ कार्यालयले कार्यक्रम नै बनाएर अभियान थालेको डिभिजन वन कार्यालय दाङका प्रमुख मोहनप्रसाद श्रेष्ठले जानकारी दिए ।

सर्पको उद्दारमा लामो समयदेखि खटेका रेञ्जर यमबहादुर रावतले नेपालमा पाइने सर्पका प्रजाति, सर्पका विशेषता, बिशालु सर्पको पहिचान र उद्दारका लागि अपनाउनु पर्ने विधिका बारेमा जानकारी गराएका थिए । तालिमपछि संस्थागत रुपमा उनीहरुलाई सर्प उद्दार सामग्री समेत प्रदान गरिएको थियो ।

डिभिजन वन कार्यालय दाङका प्रमुख मोहनप्रसाद श्रेष्ठको अध्यक्षतामा भएको कार्यक्रममा डिभिजन वन कार्यालय, नेपाली सेना, सशस्त्र प्रहरी, नेपाल प्रहरी र रेडक्रसमा आवद्ध प्रतिनिधिहरुलाई तालिम दिइएको थियो ।