खोज

बर्दघाट, २६ चैत ।

बर्दघाट खानेपानी तथा सरसफाई उपभोक्ता सँस्थाले एकघर एकधारा घोषणा गरेको छ । संस्थाको २२ औँ वार्षिक साधारण सभा एवं ९ औँ अधिवेशनको अवसर पारेर संस्थाले आयोजना क्षेत्रभित्रका ४ हजार ७० घरमा धारा जडान गर्दै हरेक घरमा धारा जोडिएको घोषणा गरेको हो । २०५५ सालमा ५० सामुदायिक धाराबाट खानेपानी वितरण सुरु गरेको सँस्थाले अहिले आयोजना क्षेत्र भित्रका ४ हजार ७० घरमा धारा वितरण गरी २४ सै घण्टा शुद्ध पिउने पानी उपलब्ध गराउँदै आएको छ ।

सँस्थाको २२ औँ साधारण सभा एवं एकघर एक धारा घोषणा कार्यक्रमलाई सम्बोधन गर्दै बर्दघाट नगरपालिकाका प्रमुख शम्भुलाल श्रेष्ठले बर्दघाट खानेपानी सँस्थाले नेपाल गुणस्तरको खानेपानी २४ सै घण्टा उपलब्ध गराउँदै आएकोमा खुसी ब्यक्त गर्दै आगामी दिनमा समेत निरन्तरता रहने आशा ब्यक्त गरेका छन् ।

बर्दघाट नगरपालिका अन्तर्गत अन्य वडाहरुमा पनि खानेपानी आयोजना रहेको तर बर्दघाटले २४ सै घण्टा सेवा उपलब्ध गराएको बताउँदै अन्य आयोजनाले पनि शुलभ र सहज खानेपानी उपलब्ध गराउनु पर्ने बताएका हुन् ।

कार्यक्रममा बोल्दै बर्दघाट नगरपालिकाका सँस्थापक नगर प्रमुख धिरज शर्माले बर्दघाट खानेपानी सँस्थाले वडा नम्बर ४ का सबैको घरमा खानेपानी पँहुच पु¥याइरहँदा सरसफाई क्षेत्रमा समेत उदाहरणीय काम गर्नुपर्ने बताए । उनले नगरले खानेपानी र सरसफाईलाई प्राथमिकतामा राखी योजनाहरु अघि बढाउनुपर्ने समेत बताए । ‘बर्दघाट खानेपानीको आयोजना क्षेत्रमा खानेपानीको समस्या छैन तर अन्य वडाहरुमा सहज हुन सकेको छैन, नगरले सबै वडाका नागरिकलाई सहज रुपमा पिउने पानी उपलब्ध गराउनु पर्छ’ शर्माले भने ।

कार्यक्रममा दामोदर जिसी, रविन्द्र विक्रम हमाल, गँगा पाण्डे, मिलन श्रेष्ठ, महेन्द्र सिँह ठकुरी, वृहस्पती अधिकारी, चुडामणी भण्डारी लगायतले सम्बोधन गरेका थिए ।

कार्यक्रममा सँस्थाका अध्यक्ष धातानन्द बश्यालले वार्षिक प्रगति प्रतिवेदन, उपाध्यक्ष दिपक लम्सालले खानेपानी सुरक्षा योजना प्रतिवेदन, कोषाध्यक्ष थुमकला बसेलले आर्थिक प्रतिवेदन र लेखा सँयोजक गोपाल पाण्डेयले लेखा प्रतिवेदन प्रस्तुत गरेका थिए । प्रस्तुत प्रतिवेदनलाई बन्दसत्रले पारित समेत गरेको थियो ।