खोज

बुटवल, २६ चैत ।

प्रथम आर.के.तेक्वान्दो अन्तर विद्यालय प्रतियोगिताको उपाधि सिद्धार्थ बोर्डिङ स्कुलले जितेको छ । आरकेएफ तेक्वान्दो एकेडेमी र सिद्धार्थ बोर्डिङ स्कुलको आयोजनामा शनिबार भएको प्रतियोगितामा ८ स्वर्ण, ५ रजत, ४ कास्य जित्दै सिद्धार्थ बोर्डिङ स्कुल च्याम्पियन भएको हो ।

सिद्धार्थ बोर्डिङ स्कुल परिसरमा भएको प्रतियोगितामा ७ स्वर्ण, ४ रजत, ३ कास्य जित्दै सिद्धेश्वर मावि द्वितीय तथा ५ स्वर्ण, ३ रजत २ कास्यसहित लुम्बिनी स्कुल र पामिर स्कुल तेस्रो भएको छ । ग्रासरुट खेल विकास र युवा खेलाडीहरुलाई प्रोत्साहन गर्ने उद्देश्यका साथ प्रतियोगिता आयोजना गरिएको आरके तेक्वान्दो एकेडेमीका अध्यक्ष राजकुमार पाण्डेले बताए । मार्शल आर्ट खेल कुनै बेला रुपन्देहीको पहिचान बन्न सफल रहेको भन्दै उनले यसलाई कायम राख्न जुनियर लेभलका प्रशिक्षण र नियमित प्रतियोगिताहरु आयोजना हुनुपर्ने बताए ।

एक समारोहका बीच सिद्धार्थ बोर्डिङ स्कुलका प्राचार्य यम बहादुर राना, नेपाल तेक्वान्दो संघ लुम्बिनी प्रदेशका सदस्य राजिव सिह क्षेत्री, पामिर स्कुलका शिक्षक नवीन शाक्य तथा अभिभावकहरुले बिजेता उपविजेता खेलाडी तथा उत्कृष्ट खेलाडीहरुलाई पदक तथा प्रमाणपत्र वितरण गरेका थिए ।

कार्यक्रममा सिद्धार्थ बोर्डिङ स्कुलका प्राचार्य यम बहादुर रानाले विद्यालयमा शैक्षिकसंगै खेलकुद गतिविधिमा जोड दिदा विद्यार्थीहरुमा सिकाई प्रभावकारी भएको बताए । खेल विकासमा नीजि विद्यालयहरुबाट धेरै योगदान गरेको दाबी गर्दै उनले पूर्वाधारका विकासमा सरकारको ध्यान जानुपर्ने सुझाव दिए ।

प्रतियोगितामा सिद्धार्थ बोर्डिङ स्कुल, अक्सफोर्ड स्कुल, लुम्बिनी बोर्डिङ स्कुल, पामिर स्कुल, त्रिभुवन स्कुल, स्कलर्स हो बोर्डिङ स्कुलका १ सय ५० खेलाडीहरुले विभिन्न तौल समूहमा प्रतिष्पर्धा गरेका थिए ।