खोज

दाङ, २४ चैत ।

जिल्ला विपद व्यवस्थापन समितिको बैठकले गर्मी मौसम सुरु भएको हुँदा आगलागीका घटनाहरु हुने सम्भावनालाई मध्यनजर गर्दै जोखिमबाट बच्न, बचाउन तथा नियन्त्रणका लागि पूर्व तयारी स्वरुप पालिका स्तरमा विभिन्न गतिविधिहरु संचालन गर्ने निर्णय गरेको छ । विपद व्यवस्थापन समिति संयोजक एवम् प्रमुख जिल्ला अधिकारी सुशील वैद्यको अध्यक्षतमा बिहीबार बसेको पालिका स्रोतको बैठकले पालिकाका सबै वडा क्षेत्रहरुमा आगलागी तथा वन डढेलोका घटना भएमा तत्कालै स्थानीय आपतकालीन कार्य संचालन केन्द्रहरुले जिल्ला आपतकालीन कार्य संचालन केन्द्रमा सूचना दिई नजिकका सुरक्षा निकायसंग समन्वय गरी नियन्त्रण गर्ने निर्णय गरेको छ ।

यसैगरी, विपद नियन्त्रण कार्य योजनाको आधारमा सबै स्थानीय तहहरुले आगलागीको रोकथाम तथा नियन्त्रणका लागि विभिन्न भाषामा जनचेतनामुलक सन्देश तयार गरी प्रकाशन तथा प्रशारण गरी जिल्ला आपतकालीन कार्य संचालन केन्द्रमा जानकारी गराउने निर्णय गरेको सहायक प्रमुख जिल्ला अधिकारी सावित्रा पुनले जानकारी दिइन् । बैठकले पालिकामा रहेका दमकल, साथै अग्नि नियन्त्रणका सामग्रीहरु तयारी अवस्थामा राख्ने र उद्दारमा प्रयोग हुने सामग्रीहरुको अभिलेख अद्यावधिक गरी जिल्ला आपत्कालीन कार्य संचालन केन्द्रमा पठाउने निर्णय गरेको बताइन् । बैठकमा जिल्लाका गढवा र दंगीशरण गाउँपालिकाबाहेक ८ वटै पालिकाका जनप्रतिनिधि, जिल्ला विपद व्यवस्थापन समिति सदस्यहरुको उपस्थिति रहेको थियो ।
गर्मी मौसम शुरुभएसँगै केही दिनयता जिल्लामा आगलागीको जोखिम बढेको छ । जिल्लाको देउखुरी क्षेत्रका सामुदायिक वन तथा सार्वजनिक स्थलमा आगलागीका घटना भइरहेका छन् ।

यसैबीच, जिल्ला आपतकालीन कार्यसंचालन केन्द्र दाङले यो वर्षको हालसम्म ५८ वटा आगलागीका घटना भएको जनाएको छ । जसबाट सयौँ बिस्थापित भएका छन् । आगलागीमा परी जिल्लामा यो वर्ष कसैको पनि ज्यान नगएको जिल्ला आपतकालीन कार्य संचालन केन्द्रका होमलाल न्यौपानेले बताए । जिल्लामा बैशाखदेखि चैत्रको आजसम्म विभिन्न प्रकृतिका विपदजन्य घटनाका कारण करीव १९ करोड ५० लाख ५८ हजार बराबरको क्षति भएको जनाइएको छ ।