खोज

बुटवल, २२ चैत ।

नेपाल कम्यूनिष्ट पार्टी एमाले देवदह नगर कमिटीले प्रशिक्षण कार्यक्रम सम्पन्न गरेको छ । पार्टी केन्द्रीय कमिटीले सञ्चालन गरेको मिसन ग्रासरुट अभियान अन्तर्गत नगर कमिटीले प्रशिक्षण कार्यक्रम गरेको हो ।

पार्टीका नगर कमिटी अध्यक्ष हिराबहादुर थापाको अध्यक्षतामा भएको कार्यक्रममा बोल्दै केन्द्रीय सदस्य एवं मिसन ग्रासरुट देवदहका संयोजक सरिता भुसालले पार्टीमा बढिरहेको अवसरवाद र अराजकतावाद अन्त्यको लागि मिसन ग्रासरुट अभियान संचालन गरेको बताइन् । उनले पार्टी बलियो बनाउन, संगठन विस्तार गर्दै कार्यकर्ताहरुलाई पार्टीको नीति, कार्यक्रम र समग्र देशको अवस्थाको वारेमा जानकारी दिने उद्देश्यले मिसन ग्रासरुट अन्तर्गत प्रशिक्षण कार्यक्रम गरिएको बताइन् ।

उनले संगठनात्मक अराजकता अन्त्यको लागि पार्टीका सवै नेता, कार्यकर्ताहरु लाग्नु पर्नेमा जोड दिइन् । प्रतिनिधि सभा सदस्य समेत रहेकी नेतृ भुसालले पार्टी भित्र चाकरी प्रथा बढिरहेको बताउँदै त्यसलाई चिर्दै देशको अवस्था परिवर्तन गर्ने गरी लाग्न कार्यकर्ताहरुलाई आग्रह गरिन् ।

उनले पार्टी भित्रको अन्तरविरोध सामाजिक सञ्चालमा राख्ने प्रवृत्ति मौलाउँदै गएको बताउँदै चित्त नबुझेको कुरा पार्टी कमिटीको बैठकमा राख्न आग्रह गरिन् । उनले नागरिकको चाहना अनुसार जनप्रतिनिधिहरुले काम गर्नुपर्नेमा जोड दिइन् । नेता तथा कार्यकर्ताहरुलाई प्रशिक्षण दिदै प्रदेश कमिटी सदस्य डा.आरसी आचार्यले श्रम गर्ने वानीको विकास नभए सम्म देशमा समाजवाद आउन नसक्ने बताए । उनले सरकारले अबलम्वन गरेको ३ खम्बे अर्थ नीति अनुसार काम गर्न सकेमात्र देशको अर्थतन्त्र सुधार हुने बताए । उनले नेपालमा रहेका उद्योग कलकारखाना नीजि क्षेत्रलाई सुम्पिदा अहिले देशको अर्थतन्त्र विग्रदै गएको बताए । उनले युवा शक्तिहरुलाई उत्पादनमा जोडन आवश्यक रहेको औल्याए ।

सोही कार्यक्रममा प्रशिक्षण दिदै राष्ट्रिय प्रतिनिधि परिषद सदस्य बद्री खनालले जनताको बहुदलीय जनवादको माध्यमबाट मात्र देशमा समाजवाद ल्याउन सकिनेमा जोड दिए । उनले देशमा अहिले पनि सामन्तवादका अवशेषहरु कायम रहेको बताउँदै विचौलीयाहरुको हालीमुहाली रहेका कारण देशको अर्थतन्त्र ध्वस्त भएको बताए । उनले पार्टी भित्र रहेको अन्तरघातको अन्त्यले मात्र पार्टी बलियो हुनेमा जोड दिए ।