खोज

लुम्बिनी, २२ चैत ।

लुम्बिनी विकास कोषले विभिन्न संस्थाहरुको साझेदारीमा चैत २३ गतेबाट कपिलबस्तुको पर्यटकीय स्थल सगरहवामा गर्ने भनेको कपिलवस्तु राष्ट्रिय मूर्तिकला कार्यशाला सरेको छ । सगरहवा पुरातात्विक महत्वको स्थल भएकाले हेरिटेज प्रभाव मूल्यांकन प्रतिवेदन नआई सकेका कारण कार्यशालाको मिति पछाडि सार्ने निर्णय गरिएको कोषका कोषाध्यक्ष एंव कार्यशाला निर्देशक समितिका संयोजक ढुण्डिराज भट्टराई (सिद्धिचरण) ले जानकारी दिए ।

कार्यशालाका संयोजक कपिलवस्तु नगरपालिका नगरप्रमुख सुदिप पौडेल र लुम्बिनी विकास कोषका कोषाध्यक्ष सिद्धिचरण भटराई, कोषका पुरातत्व महाशाखा प्रमुख हिमाल उप्रेती सहित मुर्तिकारहरुको टोलीले मंगलबार स्थलगत अवलोकन समेत गरेको थियो ।

अवलोकन पश्चात ढुंगा व्यवस्थापनको पूर्णता र बिद्युत व्यवस्थापन हुन बांकी रहेको, मुर्तिकारहरुले ढुंगाको थ्रिडी तस्वीर प्राप्त गरेपश्चात मात्र मूर्तीको म्याकेट पठाउनुपर्ने भएकाले प्राविधिक रुपमा पनि समय सार्नुपर्ने अवस्था आएको आयोजकहरुको भनाई छ । कार्यशालाको नयाँ कार्यतालिका पनि सार्वजनिक गरिएको छ ।

सगरहवाको एतिहासिक तथ्य सम्बन्धी मुर्तिकारहरुलाई प्रदान गरी अध्ययनका लागि चैत्र ३० सम्मको समय दिइएको छ । मूर्तिकार एंव विज्ञ समुह, बौद्ध धर्मगुरु, बिश्व बिद्यालयका सम्बन्धीत बिषयका प्रोफेसर सहितको भर्चुअल कार्यशाला २०८० वैशाख ४ गते गरिनेछ । भर्चुअल संवाद पछि बैशाख १० गते भित्र मूर्तिकारहरुसंग सगरहवाको बौद्धकालिन कथामा आधारित म्याकेट प्रदान गर्ने र वैशाख १२ देखि १५ गते भित्र म्याकेट फाइनल गरी छनौट भएको मुर्तिकारसंग सम्झौत गर्ने कार्यसुची तय गरिएको कोषाध्यक्ष भट्टराईले बताए ।

म्याकेट तयार भएपछि मात्रै मात्रै मूर्तिकला कार्यशाला आरम्भ गर्ने मिति तय हुने जनाइएको छ । कार्यतालिकामा भएको हेरफेरले साझेदार र सहयोगी संस्थाहरुप्रति पर्न गएको असुविधा कपिलबस्तु राष्ट्रिय मूर्तिकार्यशालाका तर्फबाट निर्देशक समितिले क्षमा याचना गरेको छ ।