खोज

बुटवल, १६ चैत ।

बुटवल उपमहमनगरपालिकाका उपप्रमुख सावित्रादेवी अर्यालले महिलाहरु आत्मनिर्भर हुन आवश्यक रहेको बताएकी छन् । “महिलाहरुमा इच्छाशक्ति भयो भने जस्तासुकै काम गर्न सकिन्छ”– अर्यालले भनिन् ।

रोटरी क्लब अफ तिनाउ बुटवलको आयोजनामा किशोरी आमाहरुका लागि आयोजना गरिएको ३ महिने सिलाई कटाई तालिम कार्यक्रमको उद्घाटन गर्दै उपप्रमुख अर्यालले सीप सिकेका महिलाहरुले निर्माण गरेका सामग्री नगरपालिकाले खरिद गर्ने र बजारीकरणमा सहयोग गर्ने बताएकी हुन् । तालिममा सहभागी किशोरी आमाहरुलाई सिलाई सामग्री हस्तान्तरण गरी उदघाटन गरिएको कार्यक्रममा बोल्दै उपप्रमुख अर्यालले महिलाहरुले आर्थिक उपार्जन गर्न नसक्दा सम्म कहिल्यै सफल र सक्षम हुन नसक्ने बताइन् ।

“अब तपाईहरुले सिकेर तयार गरेका वस्तुहरु बुटवल उपमहानगरपालिकाले लिन्छ, हामीले कोशेली घर निर्माण गर्दैछौ, सबै महिलाहरुले उत्पादन गरेका बजारीकरणका लागि योग्य सबै वस्तुहरु बुटवल उपमहानगरमा ल्याउनुस्, नगरले लिन्छ, अनि कहाँ निर्यात गर्नुपर्छ ? नगरपालिकाले त्यो काम गर्छ”, उपप्रमुख अर्यालले भनिन् ।

अर्यालले बुटवल उपमहानगरपालिकामा रहेका महिलाहरुलाई सबल, सक्षम र आर्थिक उपार्जन गर्न सक्ने बनाउन बिभिन्न सिपमूलक तालिमको आयोजना गरिरहेको बताइन् । बुटवल उपमहानगरपालिका वडा नम्बर ११ का वडा अध्यक्ष रामचन्द्र खनालले मनको डर र लाज हटाएर लाग्ने हो भने महिलाहरु सक्षम हुन धेरै समय नलाग्ने बताइन् ।

सीपहरु मध्येको उत्कृष्ट सिप सिलाई कटाइले अन्य फेसन डिजाइनरका काम पनि गर्न सहज हुने वडा अध्यक्ष खनालको भनाई थियो । नगरले, वडाले खुलाएका महत्वपूर्ण तालिममा महिलाहरुको सहभागिता हुन नसकेको भन्दै सीप सिक्न चाहने किशोरी वा अन्य महिलाहरुले वडामा सम्पर्क गर्न अनुरोध गरिन् । रोटरी क्लबका एजी राजुदेवी खनालले परीक्षा दिएपछि जहिले पनि नतिजा राम्रो आओस भन्ने चाहाना हुन्छ, त्यसैले नतिजा आउँदा सकारात्मक र सक्षम आर्थिक उपार्जन सक्ने किशोरीका रुपमा स्थापित हुन सक्नेगरी सीप सिक्न अनुरोध गरिन् । रोटरी क्लब अफ तिनाउ बुटवललका प्रेस सल्लाहकार अस्मिना पाण्डेले बुटवलमा रहेका छिटो विवाह गरेका किशोरी आमाहरुका बिषयमा अध्ययन गरेर उनीहरुका समस्या पहिचान गरी जिवनउपयोगी सिपको आवश्यकता पहिचान गरी आत्मनिर्भर बनाउनका लागि तालिमको आयोजना गरिएको बताइन् ।

रोटरी क्लब अफ तिनाउका अध्यक्ष कल्पना तिवारीले महिलाहरु मात्रै आवद्ध रहेको क्लबमा रहेका महिलाहरुले आफ्नो खाजा खर्चबाट जोगाएर बचत गरेको केही रकम र रोटरी डिष्ट्रिकको सहयोगमा तालिमको आयोजना गरिएको बताइन् ।

किशोरी आमाहरुको सहभागिता रहेको ३ महिने सिलाई कटाइ तालिमको लामो समयदेखि सिलाई कटाईमा सक्रिय विमला प्रधान प्रशिक्षकको रुपमा रहेकी छन् । कार्यक्रम क्लबका प्रेसिडेन्ट इलेक्ट अमृता भुसाल, सचिव अनिता भुसाललगायतले पनि बोलेका थिए ।