खोज

दाङ, १५ चैत ।

दाङमा पशुमा लाग्ने लम्पी स्किन रोगको प्रकोप बढ्दै गएको छ । खासगरी अहिले जिल्लाको बंगलाचुली, राप्ती, लमही, गढवा, राजपुर, घोराहीका केही वडालगायत पालिकामा रोगको प्रकोप बढेको पशुशाखाहरुको भनाई छ । भाइरसबाट सर्ने रोग लम्पी स्किनका कारण जिल्लाका विभिन्न पालिकाका स्थानीय किसान निकै चिन्तामा परेका छन् ।

भारत र बंगलादेशमा देखिएको यो रोग नेपालमा फैलिएको हो । लम्पी स्किन संक्रमणको उपचार हालसम्म पत्ता लागेको छैन । यसको रोकथामका लागि अरु पशुमा सर्नबाट रोक्नु रहेको पशु प्राबिधिकको भनाई छ ।

यो रोग दाङकोे बंगलाचुली गाउँपालिकाको वडा नम्बर ४, ५, ६, ७ र ८ मा बढी मात्रामा देखा परेको छ । रोगका कारण बंगलाचुली ७ जबरकोटका टीकाराम नेपाली, जुद्धबहादुर नेपाली, वडा नम्बर ८ पाँचपोखरीका तिलकराम घर्तीमगर, गोठीवनका गुमानसिंह घर्ती मगरका गाई र गोरु बिरामी परेका उपचारमा खटिएका पालिकाका पशु शाखा प्रमुख गोविन्द नेपालीले जानकारी दिए । उनका अनुसार पालिकाका करीव २ सय ५० भन्दा बढी पशु चौपाया बिरामी परेका छन् ।

रोग लागेमा पशुका शरीरमा खटिरा आउने, खटिराबाट तरल पदार्थ बगिरहने, ज्वरो आउने, खुट्टा सुन्निने तथा लुलो हुने, दूध दिन छोड्ने समस्या हुने गरेको पशु शाखा प्रमुख नेपालीले बताए ।

जिल्लास्थित पशु सेवा विज्ञ केन्द्रसँगको समन्वयमा बिरामी पशुको नमूना संकलन गरी क्षेत्रीय प्रयोग शाला सुर्खेत पठाएकोमा त्यहाँबाट लम्पी स्किन रोग पुष्टि भएको विज्ञ केन्द्रका भेटनरी अधिकृत भरत देवकोटाले जानकारी दिए । उनका अनुसार, यसको थप अनुसन्धानका लागि काठमाडौँ नमूना पठाईएको बताए ।

उता, राप्ती गाउँपालिकाको वडा नम्बर ५, ७, ८ र ९ का विभिन्न बस्तीहरुमा लम्पी स्किन रोगले पशु थलिएका छन् । यहाँ ३ सय ५० भन्दा बढी गाईगोरु बिरामी परेका पशु सेवा शाखा प्रमुख जीवराज पौडेलले बताए । उनका अनुसार पशु प्राविधिकको टोलीले पालिकाको वडा नम्बर ५ को करंगेकोट, थकरीकोट, वडा नम्बर ९ को घोसखोला, देवीकोटलगायत स्थानमा एक साताभन्दा बढी समय लगाएर उपचार गरेको छ । अहिलेसम्म राप्ती गाउँपालिकाको रुपाकोट, घोसखोला लगायत स्थानमा ५ वटा पशु मरेका पशु सेवा शाखा प्रमुख पौडेलले बताए ।

लम्पी स्किनका कारण राजपुर, लमहीलगायत ठाउँमा पनि समस्या बढ्दै गएको छ । “पहिले पहाडी क्षेत्रमा समस्या देखियो अब बिस्तारै तराई तिर सर्दै गएको छ,पशु सेवा विज्ञ केन्द्र प्रमुख सुदाम भट्टले भने, लम्पी स्किन एक प्रकारको बिफर जस्तै रोग हो । भाईरसका कारण रोग लाग्ने भएकाले उपचार छैन । रोकथामको प्रयास गर्ने हो । सबैभन्दा महत्वपूर्ण कुरा सावाधानी अपनाउनु नै हो ।”

“दाङ ल्याव छैन । सुर्खेत पठाउनुपर्छ, अहिलेसम्म यसरी नै काम चलेको छ । उता पनि नभ्याउने भए पछि केन्द्रमा पठाउने गरेको छ । यसले गर्दा पनि उपचारमा समस्या हुने गरेको छ” उनले भने, “यहाँ रोगले ग्रस्त बनाई सकेको हुन्छ, उता के भएको हो भन्ने थाहा पाउन लामो समय कुर्नु परिरहेको हुन्छ ।”

घोराही उपमहानगरपालिका वडा नम्बर १९ का पहाडी क्षेत्रमा पनि लम्पी स्किन रोगका कारण किसान मारमा परेका छन् भने पशुलाई सास्ती भएको छ भने राप्ती गाउँपालिकाको पहाडी क्षेत्रमा देखिएको लम्पी स्किनको संक्रमण २, ३ र ४ मा पनि देखा परेको पशु सेवा शाखाले जनाएका छन् ।