खोज

बुटवल, १४ चैत ।

ग्रामीण क्षेत्रमा विशिष्टकृत सेवा उपलब्ध गराउने उद्देश्यका साथ पहिलापटक अर्घाखाँचीमा ३ दिने निःशुल्क सर्जिकल शिविर गरिएको छ । रोटरी ई–क्लब अफ मेडिको फ्युजन हाईब्रिड नेपाल र छाया अस्पताल प्रालि, अर्घाखाँचीको आयोजनामा अर्घाखाँचीमा चैत ११ देखि १३ सम्म निःशुल्क सर्जिकल शिविर गरिएको हो । यस क्षेत्रका ब्यावसायिक चिकित्सकहरु रोटरी क्लबमा आवद्ध भई सामाजिक उत्तरदायित्वमा अग्रसर भएका छन् ।

अर्घाखाँचीस्थित छाया अस्पतालमा गरिएको कार्यक्रममा ६ सय ८३ बिरामीहरुको परीक्षण गरिएको थियो । जसमध्ये जनरल सर्जरी, गाईनोक्लोजी, हाईड्रोसिल, हर्निया, भेगिनल हिस्टेरेक्टोमीसहित शरीरमा भएका सबै खाले १२ जनाको मेजर र १८ जनाको माईनर अपरेसन गरिएको क्लबका अध्यक्ष डा.प्रकाश बस्नेतले बताए । यसैगरी २ सय ७३ जनाको युएसजी, ५ सय १६ जनाको ल्याब टेष्ट, ६४ जनाको ईसिजी, १२ जनाको इको तथा बिरामीहरुलाई निःशुल्क औषधी वितरण गरिएको थियो । शल्यक्रियासहित औषधी वितरण गरि करीब १० लाख रुपैयाँ बराबर खर्च भएको उनले बताए ।

शिविरमा डा. प्रदिप जंग केसी, डा. निता श्रेष्ठ, डा. बिजय भण्डारी, डा. रन्जित महतो सहित २२ जनाले प्राविधिक सहयोग गरेका थिए । अस्पतालका म्यानेजिङ डाईरेक्टर दल बहादुर केसीले ग्रामीण भेगमा आर्थिक अभावकै कारण उपचार सेवा पाउन समस्या भएकाले बिरामीहरुलाई निःशुल्क शल्यक्रिया गरिएको बताए ।