खोज

बुटवल, १२ चैत ।

मिस वेष्ट्रन नेपाल २०२३ को ताज बुटवलकी ममता घिमिरेले पहिरेकी छिन् । शनिबार अबेर भएको फिनालेमा अन्य ८ जना प्रतियोगिताहरुलाई पछि पार्दै घिमिरे विजेताको ताज जित्न सफल भईन् । उनले प्रतियोगिताको मिस पब्लिक च्वाईस समेत घोषित भईन् ।

योसंगै उनले अब मिस २०२३ मा समेत यस क्षेत्रबाट प्रतिनिधित्व गर्ने पक्का भएको छ । आईटीमा अध्ययरत उनी महिला सशक्तिकरण र सामाजिक क्षेत्रमा काम गर्न चाहन्छिन् ।
पहिलो परिचय, दोस्रो प्रश्नउत्तर राउण्डका साथै डिजाईनर राउण्डमा साज बुटिकको सहयोगमा तयार गरिएको ड्रेसमा प्रस्तुत गरेका थिए । अजिता रेग्मी, सबिता बेल्बासे, ममता घिमिरे, निसा पाण्डे, विनिता भट्टराई टप फाईभमा पुग्न सफल भए । प्रतियोगितामा अन्तिम प्रश्न उत्तर लिखित राउण्डमा उत्कृष्ट बन्दै घिमिरे विजेता बनिन् । पाँचमा परेकी बिनिता भट्टराई फष्ट रनर अप बनिन् । यसैगरी निशा पाण्डे सेकेण्ड रनर अप भईन् । प्रतियोगितामा अपसना सुनार मिस ट्यालेन्ट, अजिता रेग्मी मिस बेष्ट वाक घोषित हँुदै पुरस्कृत भईन् ।

द हिडेन ट्रेजरका निर्देशक गिरेन्द्रमान राजवंशी प्रमुख निर्णायक रहेको प्रतियोगितामा लायन्स क्लब अफ शंकरनगर बाटिकाका साधना भण्डारी, सुरज उप्रेती, नवराज न्यौपानेले निर्णायकको भूमिका निर्वाह गरेका थिए । यसैगरि फिनालेको कोरियोग्राफी रेशम न्यौपाने र दिपेश लामाले गरेका थियो।फिनालेमा पुगेका ९ जनालाई दुई हप्तासम्म क्षमता अभिवृद्धिका तालिम दिईएको थियो ।

एक समारोहका बीच मिस नेपाल २०२२ प्रियंका रानी जोशी, मिस नेपाल द हिडन ट्रेजनका निर्देशक गिरेन्द्रमान राजबंशी, डिष्ट्रिक ३२५ का डिजि नवराज न्यौपाने, मिस बेष्ट्रन नेपालका निर्देशक गोपाल अधिकारी, प्रबन्ध निर्देशक राजिव खनालले विजेता, उपविजेता तथा उत्कृष्टलाई पुरस्कार वितरण गरेका थिए ।

कार्यक्रममा मिस नेपाल २०२२ प्रियंका रानी जोशीले यो प्रतियोगिता महिला सशक्तिकरणमा महत्वपूर्ण पाटो भएको बताईन् । आफू मिस वर्डको प्लेटफर्ममा पुग्दा नेपालको पहिचान दिने गरि जाने भन्दै यसमा सबैको साथ र सहयोग आवश्यक रहेको बताईन् ।

प्रबन्ध निर्देशक राजिव खनालले हेर्ने दृष्टि चेन्ज गरे समाज परिवर्तन हुने भन्दै सुन्दरी प्रतियोगितालाई सकारात्मक रुपमा हेर्नुपर्ने बताए । सौन्दर्य प्रतियोगिता केवल शारिरिक रुपमा मात्र नभई बौद्धिक रुपमा समेत फिट हुनुपर्ने उनको धारणा छ ।

मिस नेपाल हिडन ट्रेजरको फ्रेन्चाईचीका रुपमा यस क्षेत्रमा गरिएको कार्यक्रममा सहयोग गर्ने विभिन्न संघसंस्थाहरुलाई मायाको चिनो वितरण गरिएको थियो । यसअघि दुई हप्तासम्म अन्तिम ९ सहभागीहरुलाई दुई हप्तासम्म योगा प्रशिक्षक निश्चल ईन्द्रायणी, राजिव खनाल, गोपाल अधिकारी, छबि शर्मा, समुन्द्र घिमिरे जिसिले तालिमलाई सहजिकरण गरेका छन ।