खोज

दाङ, ११ चैत ।

यस वर्षको माध्यमिक शिक्षा परीक्षा एसईईमा दाङबाट करीव साढे १३ हजार विद्यार्थी सहभागी हुँदैछन् । यही चैत १७ गतेदेखि हुन लागेको यस वर्षको एसईईमा सहभागी हुने कुल परीक्षार्थीको संख्या १३ हजार ४ सय ५२ रहेको जिल्ला शिक्षा विकास तथा समन्वय इकाई प्रमुख देवमणि चौधरीले जानकारी दिए । उनका अनुसार ७ हजार १ सय ६ जना छात्रा छन् भने ६ हजार ७ सय ४६ जना छात्र रहेका छन् । छात्रभन्दा छात्राको संख्या धेरै छ ।

परीक्षाका लागि साधारण धारतर्फ ६ हजार ७ सय ६६ छात्रा रहेका छन् भने ६ हजार ६२ जना छात्र गरी १२ हजार ८ सय २८ जना रहेका छन् । प्राविधिक धारतर्फ १ सय ७४ छात्र र १ सय ६६ जना छात्रा गरी ३ सय ४० जनाले परीक्षा दिँदैछन् ।

ग्रेड वृद्धितर्फ पनि १ सय ७४ जना छात्रा र १ सय १० जना छात्र गरी २सय ८४ जना विद्यार्थीले परीक्षा दिन लागेका समन्वय एकाई प्रमुख चौधरीले जानकारी दिए ।

उनका अनुसार, जिल्लाका १० वटै पालिकाका २ सय ३६ विद्यालयबाट यो वर्ष एसईईमा परीक्षार्थीले आवेदन दिएका छन् । तुलसीपुरबाट ८० विद्यालय, घोराही उपमहानगरपालिकाबाट ७० विद्यालय, लमही नगरपालिकाबाट १८ विद्यालय, राप्ती गाउँपालिकाबाट १५ विद्यालय, शान्तिनगरबाट १२ विद्यालय, बबई गाउँपालिकाबाट ११ विद्यालय, दंगीशरण गाउँपालिकाबाट ७ विद्यालय र बंगलाचुली गाउँपालिकाबाट ६ विद्यालयका गढवा गाउँपालिकाबाट ९ विद्यालय, राजपुर गाउँपालिकाबाट ८ विद्यालय विद्यार्थी एसईईमा सहभागी हुँदैछन् ।

विगत वर्षहरुमा प्राविधिक धारका परीक्षार्थीहरुलाई जिल्ला सदरमुकाममा गएर परीक्षा दिनुपर्ने बाध्यता थियो । यो पटकबाट जुन विद्यालयबाट प्राविधिक धारको पढाई गरेको त्यहीका साधारण धारका विद्यार्थी सरह एकै परीक्षा केन्द्रबाट परीक्षा दिने व्यवस्था मिलाईएको छ । एकाई प्रमुख चौधरीले भने, ‘प्राविधिक धारलाई जिल्ला सदरमुकाममा केन्द्र तोक्ने व्यवस्था हटाईएको छ ।’ यो पटक जुन विद्यालयमा पढेको छ, साधारण धारको जस्तै सोही केन्द्रबाट प्राविधिक धारका परीक्षार्थीले परीक्षा दिनेछन् । यो केन्द्रको निर्देशन अनुसार व्यवस्था गरिएको छ ।

उनका अनुसार जिल्लाभर ४५ वटा परीक्षा केन्द्र र केन्द्राअध्यक्ष पनि तोकिएको छ । परीक्षा संचालनका लागि केन्द्रबाट आवश्यक उत्तरपुस्तिकालगायत सामग्री जिल्लामा आईसकेको छ । अरु आन्तरिक तयारी पनि पूरा भईसकेको उनले जानकारी दिए ।