खोज

दाङ, १० चैत ।

‘राष्ट्रका लागि संगीत अभियात्रा’ लिएर जनवादी कलाकारहरुको टोली दाङ आईपुगेको छ । शहीदको सपना सम्झाउने, आर्थिक, सामाजिक, राजनीतिक अवस्था सुधार्ने अस्थिरताको अन्त्य गर्ने उद्देश्यसहित देश दौडाहामा निस्किएको जनवादी कालकारको टोली दाङ आईपुगेको हो ।

क्रान्ति, परिवर्तन र एकताका गीतहरु गुञ्जाउँदै देश परिवेशमा जनवादी कलाकारको टोलीले शुक्रबार घोराहीस्थित बहुउद्देश्यीय सभा गृहमा आफ्नो प्रस्तुति राख्नेछ ।

कलाकारको टोलीमा जनवादी गीतकार तथा संगीतकार मणि थापा, जनवादी गायक उदय श्रेष्ठ, माधव प्रधान, जीवन शर्मा, कुस्मिता दर्लामी, मोहिन श्रेष्ठ, टेक बलम्पाकी, चिरन पुन, निलिमा पुन, उदय रिजाल, लक्ष्मण पाख्रीन, कविता पुन, सन्ध्या मगर, कर्ण विद्रोही, साहित्यकार तथा जनवादी गायक नारायण शर्मालगायत स्थानीय जनवादी कलाकारको प्रस्तुति रहने आयोजकले जनाएको छ ।

सबै प्रदेशमा कार्यक्रम गरेर देशमा एकताको सन्देश छर्ने उद्देश्यका साथ यात्राको थालनी गरिएको घोराहीमा आयोजित पत्रकार सम्मेलनमा जानकारी गराइएको थियो ।

जनवादी गायक जीवन शर्माले भने, “हिजोका दिनबाट दुःखी गरिवका, झुपडीका गीत गाएर यहाँसम्म आईयो, अब यी पीडाका गीत गाउन नपरोस् भन्ने कामना हो, तर गाउन बाध्य हुनु परेको छ ।” राष्ट्रिय एकतालाई मजबुद बनाउन जनकलाकारले संगीत अभियात्रा थालनी गर्नु भनेको वामपन्थी विचारधाराका शक्तिहरु एक ठाउँमा उभिन सकून् भन्ने पनि रहेको उनको भनाई थियो ।

जनकलाकार एवं पूर्वमन्त्री मणि थापाले संगीतको माध्यमबाट सरकारको समालोचना गदै जनताको जनजीविकाका सवालमा आवाज उठाउँदै सरकारलाई जनउत्तरदायी बनाउने अभियान रहेको बताए ।

२००७ साल देखि हालसम्मको परिवर्तनमा कलाकारहरुको महत्वपूर्ण भुुमिका रहेको उल्लेख गदै उनले जनताले चाहे अनुुसारको परिवर्तन अझै हुन नपाएको बताए । पछिल्लो समयमा देशमा विदेशी संस्कृतिको प्रभाव नराम्ररी बढ्दै गएको हुँदा यो अभियान संस्कृति संरक्षण र कम्युुनिष्ट एकताको लागि पनि लक्षित रहेको बताए ।

चैत ४ गते कैलालीबाट शुुरु भएको अभियात्रा बिभिन्न ११ स्थानमा कार्यक्रम गरी बैशाख ५ गते काठमाडौमा कार्यक्रमको आयोजना गरी समापन गरिने उनले बताए । यसबीचमा बुटवल, चितवन, हेटौडा, बर्दिबास, सुनसरी, पोखरालगायत स्थानमा कार्यक्रम हुने उनको भनाई छ ।