खोज

दाङ, ८ चैत ।

दाङको घोराहीमा रहेको राप्ती स्वास्थ्य बिज्ञान प्रतिष्ठानले स्वास्थ्यजन्य फोहरमैला ब्यवस्थापन गरेर मासिक ४० हजार रुपैयाँ आम्दानी गर्दै आएको छ । अस्पतालबाट निस्कने फोहर ब्यवस्थापन हुन नसके मानव स्वास्थ्यमा गम्भीर असर पार्ने स्वास्थ्यजन्य फोहरमैला ब्यवस्थापन गरेर प्रतिष्ठानले मासिक ३५ देखि ४० हजार रुपैयाँसम्म आम्दानी गरिहेको प्रतिष्ठानका डेपुटी रजिष्ट्रार झन्कार लामिछानेले जानकारी दिए । स्वास्थ्यजन्य फोहरमैला ब्यवस्थापनमा भइरहेको प्रगतिबारे जानकारी दिन बुधवार प्रतिष्ठानमा आयोजित कार्यक्रममा विद्यमान स्वास्थ्य मापदण्डलाई पालना गरेर गुणस्तरीय सेवा दिइरहेको जानकारी गराइएको थियो ।

पछिल्लो डेढ बर्षदेखि प्रतिष्ठानले छुट्टै इकाई स्थापना गरी प्रशोधन गर्ने आत्याधुनिक उपकरण मार्फत फोहरलाई अलग अलग गरी निर्मलीकरण गर्ने काम गरिहेको र उक्त फोहरबाट आम्दानी समेत भइरहेको लामिछानेले जानकारी दिए ।

सेवा प्रवाहका क्रममा उत्पादन हुने फोहर संकलन गरी त्यसको उचित ब्यवस्थान गर्न प्रतिष्ठानले योजनावद्ध ढंगले काम गरिहेको कार्यक्रममा जानकारी गराइएको थियो । कार्यक्रममा स्वास्थ्यजन्य फोहर मैला ब्यवस्थापनमा भइरहेको कार्यबारे प्रतिष्ठानका डेपुटी रजिष्ट्रार झन्कार लामिछानेले प्रकाश पारेका थिए ।

नेपाल सरकार र जीआइजेडको प्राविधिक सहयोगमा भइरहेको स्वास्थ्यजन्य फोहर मैला ब्यवस्थापन कार्यक्रममा भइरहेको प्रगतिका बारेमा वेस्ट सर्भिसका प्रमुख कार्यकारी अधिकृत सन्तोष पौडेलका साथै सो सर्भिसका दिपेन्द्र उप्रेती, फिल्ड कोअर्डिनेटर केशव खड्काले कार्य प्रगतीबारे प्रकाश पारेका थिए । कार्यक्रममा एकिकृत स्वास्थ्य फोहरमैला प्रवद्र्धनको अवस्था, नेपालमा फोहर ब्यवस्थापनका बिषयमा भइरहेका अभ्यास, स्वास्थ्य सेवा प्रदान गर्ने क्रममा निस्कने फोहर, त्यसको जोखिम र ब्यवस्थापनमा गर्नुपर्ने उपायका बिषयमा छलफल गरिएको थियो ।

कार्यक्रममा बोल्ने बक्ताहरुले श्रोतमै फोहर घटाउनु पर्ने, फोहर ब्यवस्थापनका लागि स्थानीय सरकारले गर्नुपर्ने सहयोग र संस्थाहरुले पनि समन्वय गर्नुपर्ने, फोहर ब्यवस्थापनका लागि स्वास्थ्य संस्था स्वयंले गम्भीर ढंगले योजना बनाई लाग्नुपर्ने, मानिसहरुको ब्यवहारमा सुधार ल्याउनुपर्ने लगायत कुरामा जोड दिएका थिए ।

कार्यक्रममा घोराही उपमहानगरपालिका स्वास्थ्य शाखा प्रमुख नारायण प्रसाद घर्तीले घोराही उपमहानगरपालिकाले राप्ती स्वास्थ्य विज्ञान प्रतिष्ठानले थालेको उहाहरणीय कार्यमा सहयोग गर्ने प्रतिवद्धता ब्यक्त गरेका थिए । सात दिन सम्म चल्ने छलफल कार्यक्रममा प्रतिष्ठानमा कार्यरत कर्मचारीहरुलाई चरणबद्ध रुपमा तालिम गरिने कार्यक्रम रहेको प्रतिष्ठानले जनाएको छ । प्रतिष्ठानका निमित्त उपकुलपति एंव शिक्षाध्यक्ष डा. वसन्त लामिछानेको अध्यक्षतामा कार्यक्रम भएको थियो ।